روسی ڈرون حملوں سے یوکرین میں بجلی منقطع، لاکھوں متاثر

کییف (ڈیلی اردو) یوکرینی حکام کے مطابق روسی ڈرون حملوں کے نتیجے میں یوکرین کے جنوبی علاقے زاپوریژیا کی بجلی عارضی طور پر منقطع ہو گئی جبکہ وسطی علاقے دنیپروپیترووسک میں چھ لاکھ سے زائد گھرانوں کو بجلی کی سہولت سے محروم ہونا پڑا۔

روس کی جانب سے یہ بمباری ایسے وقت میں کی گئی ہے جب امریکہ کی قیادت میں یوکرین میں لڑائی ختم کرنے اور امن کے قیام کے لیے سفارتی کوششیں جاری ہیں۔ یوکرین اور اس کے مغربی اتحادی ایک فریم ورک کے تحت امن تصفیہ پر کام کر رہے ہیں، لیکن ماسکو نے عوامی سطح پر کسی سمجھوتے کا عندیہ نہیں دیا۔

یوکرینی صدر وولودیمیر زیلنسکی نے رات کے وقت ہونے والے اس حملے کی شدید مذمت کرتے ہوئے کہا کہ توانائی کی تنصیبات اور انفراسٹرکچر پر حملوں کا کوئی فوجی جواز نہیں، جو سردیوں میں شہریوں کو بجلی اور حرارت (ہیٹنگ) سے محروم کر دیں۔ زیلنسکی نے مزید کہا کہ ماسکو کی جارحیت روکنے کے لیے بین الاقوامی دباؤ بڑھانا ضروری ہے۔

روس نے 2022 میں یوکرین پر حملے کے بعد سے بار بار یوکرین کے پاور گرڈ کو نشانہ بنایا ہے۔ یوکرینی حکام اس حکمت عملی کو ’’موسمِ سرما کو بطور ہتھیار استعمال کرنا‘‘ قرار دیتے ہیں۔

زاپوریژیا میں تقریباً 15 لاکھ کی آبادی کے حامل علاقے کو پہلی بار چار گھنٹے تک بجلی سے محروم ہونا پڑا۔ نجی توانائی کمپنی ڈی ٹی ای کے کے مطابق ایمرجنسی عملے نے گرڈ کی مرمت کر دی ہے، تاہم دنیپروپیترووسک میں جمعرات کی دوپہر تک لاکھوں افراد اب بھی بجلی سے محروم ہیں۔

دوسری جانب، روسی وزارت دفاع نے بتایا کہ ان کے فضائی دفاعی نظام نے روسی علاقوں، کریمیا، بحیرہ اسود اور بحیرہ ازوف کے اوپر رات بھر 66 یوکرینی ڈرون مار گرائے۔