ریاست کی یہ ذمہ داری ہے کہ کوئی بھی بھوکا نہ رہے: وزیراعظم عمران خان

اسلام آباد (ڈیلی اردو/ اے پی پی) وزیراعظم عمران خان کی زیرصدارت اشیاء ضروریہ کی وافر فراہمی اور قیمتوں میں کمی لانے کے حوالہ سے جمعرات کو یہاں ایک اجلاس منعقد ہوا۔

اجلاس میں وفاقی وزیر مواصلات مراد سعید، وزیراعظم کی معاون خصوصی ڈاکٹر ثانیہ نشتر، وفاقی سیکرٹری خزانہ، سیکرٹری انڈسٹریز، سیکرٹری مواصلات، چیئرمین یوٹیلیٹی سٹور کارپوریشن ذوالقرنین علی خان، سی ای او این آئی ٹی بی سیّد شباہت علی شاہ اور دیگر سینئر افسران نے شرکت کی۔

اجلاس میں عام آدمی کے استعمال میں آنے والی اشیاء ضروریہ مثلا آٹا، گھی، چینی، دالیں اور چاول کی وافر فراہمی اور ان اجناس کی قیمتوں میں کمی لانے کے حوالہ سے مختلف تجاویز پیش کی گئیں۔

وزیر اعظم عمران خان کی زیرصدارت عام آدمی کے زیر استعمال آنے والی اشیائے ضروریہ کی وافر فراہمی اور قیمتوں میں کمی لانے کے حوالے سے اجلاس۔ pic.twitter.com/z1OwRLaQuB

— Government of Pakistan (@GovtofPakistan) November 7, 2019

وزیراعظم کی معاون خصوصی برائے تخفیف غربت و سماجی فلاح و بہبود ڈاکٹر ثانیہ نشتر نے احساس پروگرام کے کم آمدنی والے اور غربت سے متاثرہ افراد کو اشیاء ضروریہ کی فراہمی کیلئے تجاویز پیش کیں۔

چیئرمین یوٹیلیٹی سٹور کارپوریشن ذوالقرنین نے وزیراعظم کو ملک بھر میں پھیلے یوٹیلیٹی سٹورز کے نیٹ ورک اور اشیاء ضروریہ کی فراہمی اور قیمتوں میں کمی لانے کے حوالہ سے تجاویز پیش کیں۔ چیئرمین یوٹیلیٹی سٹور کارپوریشن نے بتایا کہ اس وقت یوٹیلیٹی سٹور کے 4 ہزار مرکز موجود ہیں جو اشیا ضروریہ کی فراہمی اور ان کی قیمتوں میں کمی لانے میں اہم کردار ادا کر سکتے ہیں۔

وفاقی وزیر مواصلات نے تجویز پیش کی کہ یوٹیلیٹی سٹور کے 4 ہزار مراکز کے علاوہ ملک دور دراز علاقوں میں موجود پاکستان پوسٹ کے آفسز کو بھی اس مقصد کیلئے استعمال کیا جا سکتا ہے۔

وزیر اعظم عمران خان نے اجلاس سے خطاب کرتے ہوئے کہا کہ ریاست کی ذمہ داری ہے کہ اس بات کو یقینی بنایا جائے کہ کوئی فرد بھوکا نہ سوئے۔ انہوں نے کہا کہ حکومت ریاست کا یہ فرض پورا کرنے کیلئے ہر ممکن کوشش کر رہی ہے۔

وزیراعظم نے کہا کہ ہماری ذمہ داری نہ صرف اشیاء ضروریہ کی وافر فراہمی کو یقینی بنانا ہے بلکہ ان کی قیمتوں پر بھی قابو پانا ہے تاکہ کم آمدنی والے اور غربت کے شکار افراد اور خاندانوں کو ضرورت کی بنیادی اشیاء باآسانی میسر آئیں۔

وزیراعظم نے ہدایت کی کہ یوٹیلیٹی سٹورز پر اشیاء ضروریہ کی وافر فراہمی اور غریب افراد کیلئے ان اشیاء کی کم قیمت پر فراہمی سے متعلق تجاویز کو فوری طور پر حتمی شکل دی جائے تاکہ ان پر عملدرآمد کیا جا سکے اور عوام کو ریلیف فراہم کیا جا سکے۔