سرینگر: جموں کے جنگلات میں عسکریت پسندوں کے خلاف فوجی آپریشن، بھارتی پولیس اہلکار زخمی

نئی دہلی  (ڈیلی اردو) انڈیا کے زیرِ انتظام کشمیر کے جنوبی صوبے جموں کے بھِلاور قصبے کے جنگلات میں وسیع پیمانے پر فوجی آپریشن جاری ہے۔ جموں پولیس کے مطابق یہ کارروائی کالعدم جیش محمد گروہ سے تعلق رکھنے والے تین مسلح عسکریت پسندوں کی موجودگی کے باعث شروع کی گئی۔

جموں کے انسپکٹر جنرل بھیم سین طُوطی نے بتایا کہ بدھ کی شب گھیرے میں لیے گئے عسکریت پسندوں نے فورسز پر فائرنگ کی، جس کے نتیجے میں ایک پولیس اہلکار زخمی ہوا۔

بھِلاور قصبہ جموں کے ہندو اکثریتی ضلع کٹھوعہ میں واقع ہے۔ یاد رہے کہ پچھلے چند برسوں میں پیرپنجال کے ہمالیائی سلسلے کے جنگلاتی علاقوں میں پونچھ، راجوری، ڈوڈہ، کشتواڑ، کٹھوعہ اور اُدھم پور میں متعدد مسلح جھڑپیں ہو چکی ہیں، جن میں انڈین فورسز کے کئی افسر اور اہلکار ہلاک ہوئے ہیں۔

انڈین فوج کے مطابق سنہ 2025 میں کشمیر میں مختلف فوجی آپریشنز میں تقریباً 46 عسکریت پسند مارے گئے، جن میں اکثریت کے تعلق پاکستان سے ہونے کا دعویٰ کیا گیا۔

یہ تازہ جھڑپ ایسے وقت ہوئی ہے کہ جب انڈیا کے وزیرِ داخلہ امت شاہ نے نئی دلی میں جموں کشمیر کی سکیورٹی صورتحال پر ایک ہنگامی اجلاس طلب کیا، جس میں فوج، نیم فوجی اداروں، پولیس اور خفیہ اداروں کے سربراہان شرکت کر رہے ہیں۔

جھڑپ کے بعد بھِلاور کے وسیع جنگلات کا محاصرہ کیا گیا ہے، جس میں فوج، نیم فوجی سی آر پی ایف اور پولیس کا سپیشل آپریشن گروپ شامل ہے۔ اس دوران پورے جموں صوبے میں سکیورٹی مزید سخت کر دی گئی اور اہم شاہراہوں پر مسافروں اور گاڑیوں کی تلاشی لی جا رہی ہے۔