سعودی دباؤ: وزیر اعظم عمران خان نے ملائیشیا کا اہم سرکاری دورہ منسوخ کر دیا

اسلام آباد (ڈیلی اردو) وزیراعظم عمران خان نے ملائیشین ہم منصب مہاتیر محمد سے کوالالمپور سمٹ میں شرکت سے معذرت کرلی ہے۔

ذرائع کے مطابق وزیراعظم عمران خان نے ملائیشین ہم منصب مہاتیر محمد سے ٹیلیفونک رابطہ کیا اور مہاتیر محمد کو اپنی مجبوریوں سے آگاہ کیا۔

وزیراعطم عمران خان نے بتایا کہ میں اپنی مجبوری کی بدولت آ نہیں سکتا، میں مصروف ہوں۔

پاکستان سے کوالالمپور سمٹ میں وزیراعظم اور وزیر خارجہ دونوں ہی شریک نہیں ہوں گے۔

ذرائع کے مطابق ترکی اور ملائیشیا پاکستان کی طرف سے عین وقت پر پیچھے ہٹنے کے باعث ناراض ہیں۔ دسمبر کے اوائل میں پاکستان نے دوحہ میں کوالالمپور سمٹ کی ابتدائی میٹنگ میں شرکت بھی کی تھی۔

تمام تیاریاں مکمل ہونے کے بعد پاکستان نے سعودی دباؤ پر کوالالمپور سمٹ میں شرکت سے انکار کردیا۔

ذرائع کا کہنا ہے کہ پاکستان ترکی اور ملائیشیا کے مشترکہ ٹی وی چینل کا مستقبل بھی خطرے میں پڑ گیا ہے۔

پاکستان سعودی دباؤ پر ترکی ملائیشیا ایران قطر اسلامی بلاک سے علیحدہ ہوگیا۔

اگر پاکستان اس بلاک کا حصہ نہیں بننا چاہتا تھا تو قبل از وقت فیصلہ کیا جانا چاہیے تھا۔ ملائیشیا نے پاکستان کو اپنے تحفظات سے آگاہ کردیا۔