سلمان رشدی پر حملہ: امریکی شہری ہادی ماتر کو 25 سال قید کی سزا

نیو یارک (ڈیلی اردو)‌برطانوی مصنف سلمان رشدی پر حملہ کرنے والے امریکی شہری ہادی ماتر کو عدالت نے 25 سال قید کی سزا سنائی ہے۔ حملہ اگست 2022 میں اُس وقت پیش آیا جب رشدی ایک ادبی تقریب میں سامعین سے خطاب کر رہے تھے۔

نیو جرسی سے تعلق رکھنے والے 27 سالہ ہادی ماتر پر اقدام قتل اور سنگین حملے کا الزام عائد کیا گیا تھا، جسے رواں برس کے آغاز میں عدالت نے ثابت شدہ قرار دیا۔

حملے کے دوران سلمان رشدی کی آنکھ ضائع ہو گئی تھی جبکہ ان کے جگر کو بھی شدید نقصان پہنچا۔ یہ واقعہ ان کے متنازع ناول “شیطانی آیات” کی اشاعت کے تقریباً 35 برس بعد پیش آیا، جس نے ماضی میں شدید عالمی ردعمل کو جنم دیا تھا۔

مذکورہ کتاب کی اشاعت کے بعد دنیا بھر میں غم و غصے کی لہر دوڑ گئی تھی، جبکہ ایران کے رہبر اعلیٰ آیت اللہ خمینی نے 1989 میں رشدی کے خلاف قتل کا فتویٰ بھی جاری کیا تھا۔

عدالتی کارروائی کے دوران ہادی ماتر نے سزا سنائے جانے سے پہلے اظہارِ رائے کی آزادی کے موضوع پر اپنا مؤقف پیش کیا اور سلمان رشدی کو “منافق” قرار دیتے ہوئے کہا کہ وہ دوسروں کو “دھمکانے” کی کوشش کرتے ہیں۔

یہ بھی واضح رہے کہ ہادی ماتر پر رشدی کے ساتھ ساتھ ان کے ساتھ اسٹیج پر موجود ہینری ریس پر بھی حملے کا الزام تھا، جس پر پہلے ہی اسے 10 سال قید کی سزا سنائی جا چکی ہے۔ استغاثہ کے مطابق دونوں سزائیں بیک وقت پوری کی جائیں گی۔

سزا کے اعلان کے وقت سلمان رشدی عدالت میں موجود نہیں تھے۔