سندھ: خیرپور سے دھماکہ خیز مواد کراچی اسمگلنگ کی کوشش ناکام، 3 ملزمان گرفتار

خیرپور (ڈیلی اردو) سندھ پولیس نے حساس اداروں کی مدد سے نیشنل ہائی وے پر کارروائی کرکے کنٹینر سے بارود برآمد کرلیا۔

ذرائع کے مطابق پولیس اور حساس اداروں نے کنٹینر کو ضبط کرکے اس کے خفیہ خانوں میں چھپا بارودی مواد قبضے میں لے کر تین ملزمان کو گرفتار کرلیا۔ ‏تینوں ملزمان کا تعلق پنجاب کے علاقے ٹامیوالی سرگودھا سے ہے۔

ذرائع کے مطابق ملزمان نے حراست میں لیے جانے کے بعد بتایا کہ وہ اسے تعمیراتی شعبے کے لیے لے کر جارہے تھے۔

ذرائع کا کہنا ہےکہ مبینہ طور پر یہ بارود غیر قانونی طور پر فروخت کیا جاتا ہے اور اس سلسلے میں اطلاع ملنے پر حساس اداروں نے خیرپور پولیس کے ہمراہ کارروائی کی۔

ذرائع نے مزید بتایا کہ غیر قانونی بارودی مواد کو تخریبی کارروائیوں میں استعمال کیے جانے کا شبہ ظاہر کیا گیا ہے اور اطلاعات ملی ہیں یہ بارودی مواد پنجاب سے کراچی پہنچایا جانا تھا تاہم اس سلسلے میں ابتدائی تفتیش جاری ہے۔