سوات میں امن مظاہرہ، ’عام شہری مزید بدامنی برداشت نہیں کریں گے‘

سوات + پشاور (ڈیلی اردو/بی بی سی) پاکستان کے شورش زدہ صوبے خیبر پختونخوا کے ضلع سوات میں جمعے کو مٹہ چوک پر سوات قومی جرگہ کی اپیل پر ایک پرامن مظاہرہ کیا گیا۔ مظاہرے میں مقررین نے زور دیا کہ وہ ہر حال میں امن چاہتے ہیں اور ایسے کسی بھی اقدام کی مخالفت کریں گے جو علاقے کے حالات خراب کرے۔

امن مظاہرے میں صوبے کی حکمران جماعت پاکستان تحریک انصاف (پی ٹی آئی)، عوامی نیشنل پارٹی (اے این پی) اور دیگر سیاسی جماعتوں کے مقامی رہنماؤں اور منتخب نمائندوں نے شرکت کی۔ سیاسی و سماجی شخصیات کے علاوہ وکلا، صحافی، تاجر اور عام شہری بھی بڑی تعداد میں شریک ہوئے۔

مقررین نے کہا کہ امن کی بحالی ریاست کی ذمہ داری ہے اور یہاں کے عام شہری کسی بھی حال میں مزید بد امنی برداشت نہیں کریں گے۔ مظاہرین نے بتایا کہ خیبر پختونخوا کے مختلف علاقوں جیسے باجوڑ، مہمند، وزیرستان اور بنوں میں بد امنی کے واقعات سامنے آتے رہتے ہیں اور سوات میں بھی بعض علاقوں میں اسی نوعیت کے خدشات موجود ہیں۔ اسی لیے قومی جرگے نے مقامی سطح پر یہ احتجاجی مظاہرہ کیا۔

مظاہرین نے اس دوران پاکستانی فوج اور خفیہ اداروں (ایم آئی اور آئی ایس آئی) کے خلاف شدید نعرے بھی لگائے اور الزام لگایا کہ ان کی طرف سے دوبارہ قتل عام کی منصوبہ بندی کی جا رہی ہے۔ تاہم مظاہرین نے کہا کہ وہ دفاتر کے سامنے بیٹھ کر اپنا احتجاج جاری رکھیں گے۔

ماضی کے تشدد کے واقعات کا حوالہ دیتے ہوئے مقررین نے کہا کہ پہلے یہاں چوکوں میں لوگوں کے سر کٹے ہوئے پڑے ملے تھے اور اب ایسا نہ ہو کہ دوبارہ ویسے حالات پیدا ہوں۔ انہوں نے باجوڑ میں امن کے قیام کے لیے کوشش کرنے والے اے این پی رہنما مولانا خان زیب کو بھی یاد کیا، جنہیں امن کی کوششوں کے دوران قتل کر دیا گیا تھا۔

یاد رہے کہ سوات میں تین سال قبل حکومت نے کالعدم تحریک طالبان پاکستان (ٹی ٹی پی) سے مذاکرات شروع کیے تھے اور مٹہ کے علاقے میں مسلح شدت پسندوں کی سرگرمیاں دیکھی گئی تھیں، جس کے بعد یہاں اور صوبے کے دیگر علاقوں میں امن پاسون کا انعقاد کیا گیا تھا تاکہ علاقے میں امن قائم ہو سکے۔