سوڈان میں ڈرون حملہ، 60 افراد ہلاک

خرطوم (ڈیلی اردو/اے ایف پی) سوڈان کے مشرقی شہر الفاشر میں بے گھر افراد کی ایک پناہ گاہ پر ایک ڈرون حملے میں کم از کم 60 افراد ہلاک ہو گئے۔ 

الفاشر کی مزاحمتی کمیٹی نے کہا کہ ریپڈ سپورٹ فورسز نے ایک یونیورسٹی کے گراؤنڈ میں قائم دار الارقم ڈسپلیسمنٹ سینٹر کو نشانہ بنایا۔ 

مزاحمتی کمیٹی کے بیان کے مطابق لاشیں زیر زمین پناہ گاہوں میں پھنسی ہوئی ہیں۔ کمیٹی نے اسے ’’قتل عام‘‘ قرار دیتے ہوئے عالمی برادری سے مداخلت کا مطالبہ کیا۔

 مقامی مزاحمتی کمیٹیاں ان امدادی کارکنوں پر مشتمل ہیں جو امداد کو مربوط کرتی ہیں اور سوڈان کے تنازعے میں مظالم کو دستاویزی شکل میں محفوظ کرتی ہیں۔ 

خیال رہے کہ سوڈان کی ریپڈ سپورٹ فورسز (آر ایس ایف) اپریل 2023 سے باقاعدہ فوج کے ساتھ جنگ ​​میں مصروف ہے۔ اس تنازعہ کے سبب ہزاروں افراد ہلاک، لاکھوں بے گھر اور تقریباً 25 ملین شدید بھوک کا شکار ہیں۔ 

دارفور کے وسیع علاقے میں آخری ریاستی دارالحکومت الفاشر، جنگ کا تازہ ترین اسٹریٹیجک محاذ بن گیا ہے، جہاں آر ایس ایف اپنی طاقت کو مستحکم کرنے کی کوشش کر رہی ہے۔ 

RSF کے محاصرے کو تقریباً 18 ماہ گزر چکے ہیں۔ الفاشر میں 400,000 شہری پھنسے ہوئے ہیں اور وہاں  تقریباً سب کچھ ختم ہو چکا ہے۔ 

مقامی مزاحمتی کمیٹیوں کے مطابق، شہر کے زیادہ تر سوپ کچن خوراک کی کمیابی کی وجہ سے بند کر دیے گئے ہیں۔