شاری بلوچ: دھماکا سے قبل خودکش حملہ آور نے شوہر کے ساتھ ’’شادی‘‘ کی سالگرہ منائی

کراچی (مانیٹرنگ ڈیسک) جامعہ کراچی میں ہونے والے خودکش حملہ کی تحقیقات میں اہم انکشافات سامنے آئے ہیں، دھماکا کرنے سے قبل خاتون اور اس کے شوہر نے شادی کی سالگرہ بھی منائی۔

تحقیقاتی ذرائع کا کہنا ہے کہ خاتون خودکش حملہ آور کا شوہر جناح اسپتال کے قریب ہوٹل میں رہائش پذیر تھا، خاتون بھی اسی ہوٹل میں فیملی کے ہمراہ رہتی رہی ہے۔

تحقیقاتی ذرائع کے مطابق دھماکا کرنے سے قبل خاتون اور اس کے شوہر نے شادی کی سالگرہ بھی منائی، خاتون کا شوہر بلوچستان میں ڈاکٹر اور جناح اسپتال میں ٹریننگ پروگرام میں شریک تھا۔

تحقیقاتی ذرائع کا کہنا ہے کہ خاتون حملہ آور کے شوہر نے سوشل میڈیا پر خودکش دھماکے کے بعد اہلیہ کی تعریف بھی کی تھی، خاتون حملہ آور کا شوہر بھی ملوث ہے، ماسٹر مائنڈ بھی ہوسکتا ہے۔

تحقیقاتی ذرائع کے مطابق دھماکے سے قبل ہی خاتون کا شوہر بچوں سمیت غائب ہوگیا، خاتون کے شوہر کی پاکستان سے فرار ہونے کی بھی اطلاعات ہیں، خاتون دھماکا خیز مواد بیگ میں لے کر سلور جوبلی گیٹ سے داخل ہوئی۔

تحقیقاتی ذرائع کا کہنا ہے کہ جس دوسری عورت سے حملہ آور ملی وہ اس کی ’’لاسٹ منٹ ہینڈلر‘‘ تھی، دوسری خاتون نے دھماکے سے کچھ دیر پہلے خودکش حملہ آور خاتون کو بریف کیا اور چلی گئی۔

گزشتہ روز ہونے والے خودکش دھماکے میں تین چینی شہری اور پاکستانی وین ڈرائیور جان سے گئے، حملے میں تین سے چار کلو گرام دھماکہ خیز مواد اور اسٹیل کے بال بیرنگ استعمال کیے گئے۔