شرپسند عناصر پاراچنار کو ایک بار پھر جنگ و جدل کی طرف دھکیلنے کی کوشیش کررہے ہیں: علامہ فدا حسین مظاہری

پاراچنار (نمائندہ ڈیلی اردو) ضلع کرم کے ممتاز روحانی پیشوا علامہ فدا حسین مظاہری نے مرکزی جامع مسجد پاراچنار میں اجتماع سے خطاب کرتے ہوئے کہا کہ قبائلی علاقوں میں فوج اور دیگر سیکورٹی فورسز نے قربانیاں دی ہیں جبکہ ضلع کرم میں طالبان کے خلاف کرم کے عوام نے بڑی قربانیاں دی ہیں اور ہمارے 6 ہزار سے زائد افراد اس دوران شہید ہوئے ہیں جبکہ ہزاروں معذوری کی زندگی گزار رہے ہیں۔

انہوں نے کہا کہ کرم میں جو مثالی امن قائم ہے یہ شرپسند عناصر کو ہضم نہیں ہوتا اور یہی عناصر مختلف حیلے بہانوں سے علاقے کو ایک بار پھر جنگ و جدل کی طرف دھکیلنے کی کوشیش کررہے ہیں۔ گذشتہ دنوں ذاتی واقعے کی اڑ میں احتجاج کرانا گاڑیاں جلانا، راستے بند کرنا، لوگوں کو اغوا کرنا ان امن دشمن عناصر ہی کی کارستانیان ہیں۔ قبیلوں کے درمیان یہ ذاتی دشمنیاں صرف کرم میں نہیں پاکستان سمیت دنیا بھر میں ہوتی ہیں۔

علامہ فدا حسین مظاہری نے لوئر کرم کے بعض دانشمند مشران کے مثبت کردار کی تعریف کرتے ہوئے کہا کہ ہم سب پر لازم ہے کہ ایسے حالات میں علاقے میں امن و امان قائم رکھنے کی بھر پور کوشش کرتے ہوئے بدامنی کا راستہ روکنا چاہیئے
انہوں نے کہا کہ جو مسلمانوں کے درمیان دانستہ یا نا دانستہ پھوٹ ڈالتے ہیں وہ اسلام دشمن عناصر کی خدمت انجام دے رہے ہیں۔

انہوں نے کہا کہ ہمارا علاقہ ضلع بنا ہے، یہاں عدالتیں اور آئین موجود ہیں ہمیں ماروئے عدالت کوئی بھی اقدام نہیں کرنا چاہیے۔ انہوں نے ضلع کرم کے عوام کو تاکید کی کہ وہ علاقے کی تعمیر و ترقی کیلیے کوششیں کرنا چاہیے۔ تعلیم، بجلی، پانی اور سڑکوں کا مسئلہ حل کرنا چاہیے۔ ہمیں چاہیئے کہ حکومت اور فوج کے ساتھ ملکر اپنے علاقے کو ترقی کی راہ پر گامزن کریں، علامہ فدا حسین مظاہری نے حکومت اور فوج کے اعلی حکام سے قبائل کے مزاج اور احساسات کو سمجھنے پر زور دیتے ہوئے کہا کہ یہاں پر لشکر کشیاں ہوئی ہیں لہذا وہ یہاں کے عوام کے احساسات اور حساسیت کو پیش نظر رکھیں۔