شمالی وزیرستان، ڈیرہ اسماعیل خان اور پشاور میں سکیورٹی فورسز اور طالبان کے مابین جھڑپیں

پشاور (نمائندگان ڈیلی اردو )  پاکستان کے شورش زدہ صوبے خیبر پختونخوا اور قبائلی اضلاع میں سکیورٹی فورسز اور تحریک طالبان پاکستان کے شدت پسندوں کے مابین متعدد جھڑپیں رپورٹ ہوئی ہیں، جن کے دوران سکیورٹی اہلکار اور دہشت گرد دونوں جانب سے ہلاکتیں اور زخمی ہونے کے واقعات سامنے آئے ہیں۔

ضلع شمالی وزیرستان کے علاقے شیواہ چوک کے قریب سکیورٹی فورسز اور تحریک طالبان پاکستان کے مابین شدید جھڑپ ہوئی، جس کے دوران دونوں جانب سے فائرنگ کا تبادلہ کیا گیا۔ اس جھڑپ میں لانس نائک جاوید اور حیات زخمی ہو گئے، جنہیں فوری طور پر طبی امداد کے لیے قریبی ہسپتال منتقل کر دیا گیا۔ فورسز کی جوابی کارروائی کے بعد شدت پسند فرار ہو گئے۔

اسی دوران، ڈیرہ اسماعیل خان کے علاقے تھانہ کھوئی بہارہ کی حدود میں بھی سکیورٹی فورسز اور طالبان کے مابین فائرنگ کا تبادلہ ہوا۔ فورسز کی کارروائی کے نتیجے میں ایک دہشت گرد ہلاک ہو گیا اور اس کی لاش ریکور کر لی گئی۔

پشاور میں بھی ایک افسوسناک واقعہ پیش آیا، جہاں پولیس اہلکار کو دہشت گردوں نے فائرنگ کرکے ہلاک کر دیا۔ 

پولیس کے مطابق ہلاک ہونے والے اہلکار کا نام عاطف خان ہے، جو پشاور پولیس لائنز میں تعینات تھے اور نواحی علاقے متھرا چار پریزہ کے رہائشی تھے۔

ذرائع کے مطابق خیبر پختونخوا اور قبائلی اضلاع میں سکیورٹی فورسز کی کارروائیاں جاری ہیں، اور مزید جھڑپوں اور آپریشنز کی تفصیلات کا انتظار ہے۔