شمالی وزیرستان میں سکیورٹی فورسز کی کارروائیاں: 10 سے زائد دہشتگرد ہلاک، متعدد زخمی

میرانشاہ (نمائندہ ڈیلی اردو) پاکستانی سکیورٹی فورسز نے خیبر پختونخوا کے قبائلی ضلع شمالی وزیرستان کے مختلف علاقوں میں کالعدم تنظیموں کے دہشتگردوں کے ٹھکانوں اور حملوں کو نشانہ بنا کر کارروائیوں کا سلسلہ جاری رکھا ہے۔ مقامی ذرائع کے مطابق حالیہ آپریشنز میں مجموعی طور پر 10 سے زائد دہشتگرد ہلاک اور متعدد زخمی ہوئے ہیں۔

سب سے پہلے سپن وام کے علاقے پٹی خیل میں عبدالقیوم مرکز پر سکیورٹی فورسز کو کالعدم ٹی ٹی پی کے دہشتگردوں کی موجودگی کی اطلاع ملی۔ فورسز نے فوری طور پر انٹیلی جنس بیسڈ آپریشن کرکے دہشتگردوں کے ٹھکانے کو نشانہ بنایا، جس کے نتیجے میں 6 دہشتگرد ہلاک اور 7 زخمی ہوئے۔ سکیورٹی فورسز نے علاقے کو مکمل طور پر کلیئر کر دیا ہے۔

اسی دوران وزگئی گاؤں میں سکیورٹی فورسز نے دہشتگردوں کی ایک تشکیل کو نشانہ بنایا۔ میر علی سے جنوبی وزیرستان کی سنگم پر واقع وزگئی میں آپریشن کے دوران کالعدم تنظیم کے 3 عسکریت پسند ہلاک ہوئے، جبکہ فورسز نے علاقے کا محاصرہ کر کے کلیئرنس آپریشن جاری رکھا۔

دتہ خیل میں سکیورٹی فورسز کی پوسٹ پر کالعدم دہشتگردوں نے حملہ کیا، تاہم فورسز نے بروقت اور موثر کارروائی کرتے ہوئے 1 دہشتگرد کو ہلاک اور 2 کو زخمی کیا۔ دیگر دہشتگرد فرار ہونے پر مجبور ہو گئے۔ سکیورٹی فورسز نے علاقے کا گھیراؤ کر کے سرچ آپریشن جاری رکھا ہے۔