شمالی وزیرستان میں سیکیورٹی فورسز کا آپریشن، 3 دہشتگرد ہلاک

راولپنڈی (ک م) پاکستانی سیکیورٹی فورسز نے خیبرپختونخوا کے قبائلی ضلع شمالی وزیرستان میں آپریشن کرتے ہوئے 3 دہشت گردوں کو ہلاک کر دیا۔

پاکستانی فوج کے شعبہ تعلقات عامہ (آئی ایس پی آر) کے مطابق 6 اور 7 فروری کی درمیانی رات سیکیورٹی فورسز نے خوارج کی موجودگی کی اطلاع پر شمالی وزیرستان کے علاقے دتہ خیال میں انٹیلی جنس کی بنیاد آپریشن کیا۔

آئی ایس پی آر کے مطابق آپریشن کے دوران سیکیورٹی فورسز نے خوارج کے ٹھکانے کو مؤثر نشانہ بنایا، جس کے نتیجے میں 3 خارجی دہشت گرد مارے گئے، جو برقعہ پہن کر بھاگنے کی کوشش کررہے تھے۔

پاکستانی فوج کے شعبہ تعلقات عامہ کے مطابق ہلاک خارجی دہشت گردوں سے اسلحہ اور گولہ بارود بھی برآمد ہوا ہے اور متعدد دہشت گردی کی کارروائیوں میں ملوث تھے۔

آئی ایس پی آر نے بتایا کہ علاقے میں موجود کسی اور خارجی کو ختم کرنے کے لیے کلیئرنس آپریشن جاری ہے، مزید کہنا تھا کہ پاکستان کی سیکیورٹی فورسز ملک سے دہشت گردی کی لعنت کو ختم کرنے کے لیے پُرعزم ہیں۔

حکومت ‏پاکستان، کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کیلئے خوارج کی اصطلاح استعمال کرتا ہے۔

دریں اثنا، وزیرداخلہ محسن نقوی نے تین خارجی دہشت گردوں کو ہلاک کرنے پر سیکیورٹی فورسز کی تحسین کی، ان کا کہنا تھا کہ بہادر سیکیورٹی فورسز نے ہمیشہ کی طرح آج بھی خارجی دہشتگردوں کے مذموم عزائم کو ناکام بنایا۔

محسن نقوی نے کہا کہ خارجی دہشت گردوں کے مکمل خاتمے کے لیے قوم یکسو ہے۔