شمالی وزیرستان ڈرون حملہ ، دھرنا جاری ، مظاہرین کا اسلام آباد کی جانب لانگ مارچ کا اعلان

میر علی (ڈیلی اردو ) شمالی وزیرستان کے علاقے میر علی میں مشتبہ ڈرون حملے کیخلاف مقامی افراد کا دھرنا آٹھویں روز بھی جاری رہا جبکہ مظاہرین نے مطالبات نہ مانے جانے کی صورت میں اسلام آباد کی جانب لانگ مارچ کا اعلان کر دیا۔

نجی ٹی وی کے مطابق میر علی کے گاؤں ہر مز میں مبینہ ڈرون حملہ 19 مئی کو دن کے وقت ہوا، جس میں ایک ہی خاندان کے 4 بچے ہلاک اور 5 افراد زخمی ہوئے، جن میں ایک خاتون بھی شامل ہے۔

پولیس اور قبائلی عمائدین کے درمیان مذاکرات بھی ہوئے لیکن وہ تا حال بے نتیجہ رہے ہیں۔

مظاہرین کا کہنا ہے کہ حملے کے نتیجے میں 4 بچے ہلاک ہوئے، اگر ان کے مطالبات پورے نہ کئے گئے تو وہ اسلام آباد کی جانب لانگ مارچ کا آغاز کریں گے۔