شمالی وزیرستان کے علاقے دتہ خیل میں چار مبینہ دہشت گرد ہلاک

میرانشاہ (نمائندہ ڈیلی اردو) صوبہ خیبر پختونخوا کے قبائلی ضلع شمالی وزیرستان کی تحصیل دتہ خیل میں سرچ آپریشن کے دوران سیکورٹی فورسز اور دہشت گردوں کے مابین جھڑپ کے نتیجے میں 4 حملہ آور ہلاک ہوگئے، سیکورٹی فورسز نے تین مکانات کا سرچ آپریشن بھی کرلیا۔

سرکاری ذرائع سے موصولہ اطلاعات کے مطابق بدھ کو تحصیل دتہ خیل کے علاقہ کمہ الگاڈ میں سیکورٹی فورسز نے سر چ آپریشن شروع کیا تھا جس کے دوران ذرائع کے مطابق سیکورٹی فورسز پر مسلح دہشت گردوں نے اچانک حملہ کردیا۔

سیکورٹی فورسز نے بھرپور جوابی کاروائی کی اور موقع پر موجود مبینہ طور پر چار دہشت گردوں کو ہلاک کردیا۔

ذرائع نے بتایا ہے کہ دہشت گردوں کے قبضے سے اسلحہ اور گولہ بارود بھی بر آمد کر لیا گیا ہے جبکہ سرچ آپریشن مکمل کر لیا گیا ہے۔