شمالی وزیرستان: گھر پر مارٹر گولہ گرنے سے 3 خواتین زخمی

پشاور (ڈیلی اردو/بی بی سی) صوبہ خیبر پختونخوا کے قبائلی ضلع شمالی وزیرستان میں گذشتہ شب ایک مکان پر مارٹر گولہ سے حملہ ہوا جس سے تین خواتین زخمی ہوئیں۔ یہ واقعہ میران شاہ کے علاقے تپی میں پیش آیا نامعلوم سمت سے فائر کیا جانے والا ماٹر گولہ مکان پر گرا۔

پولیس کے مطابق ماٹر گولہ پولیس کانسٹیبل احمد علی کی مکان پر گرا۔ چند روز پہلے ڈیرہ اسماعیل خان کے وریب درابن کے علاقے میں ایک مکان پر مارٹر گولہ گرنے سے ایک خاتون اور ایک بچہ ہلاک ہو گئے تھے۔

بروز بدھ کو ٹانک کے نواحی گاؤں گل امام کے قریب دہشت گردوں نے سکیورٹی چیک پوسٹ پر دھاوا بول کر ایک ایف سی اہلکار کو اغوا کرلیا۔

اس کے علاوہ منگل کے روز ٹانک اور درابن کے قریب دو الگ الگ واقعات میں ایف سی کے تین اور ایک بینک کی نجی سیکیورٹی کمپنی کے چار اہلکاروں کو اغوا کیا گیا۔