صدام حسین کی پھانسی کی نگرانی کرنے والے جج قاتلانہ حملے سے بال بال بچ گئے

بغداد (ڈیلی اردو) صدام حسین کی پھانسی کی نگرانی کرنے والے معروف عراقی جج منیر حداد پر قاتلانہ حملے کی کوشش ناکام بنا دی گئی۔ اتوار کی صبح نامعلوم مسلح افراد نے بغداد میں ان کی گاڑی پر فائرنگ کی۔

جج منیر حداد، جو عراقی اعلیٰ فوجداری عدالت کے سابق نائب صدر اور سابق صدر صدام حسین کی پھانسی کی نگرانی کرنے والی کمیٹی کے سربراہ رہے ہیں، نے بتایا کہ وہ اس حملے میں محفوظ رہے اور کسی قسم کا جانی نقصان نہیں ہوا۔

انہوں نے بتایا کہ ایک سفید رنگ کی "کیا" گاڑی میں سوار دو نقاب پوش مسلح افراد نے ان پر فائرنگ کی، جن میں سے ڈرائیور کے ساتھ بیٹھے شخص نے متعدد گولیاں چلائیں۔ تاہم جج حداد اس حملے میں محفوظ رہے اور حملہ آور فرار ہوگئے۔

جج منیر حداد نے انکشاف کیا کہ وہ گزشتہ چند دنوں سے مسلسل دھمکیوں کا سامنا کر رہے ہیں۔ ان کے مطابق، گزشتہ روز (ہفتے کو) انہیں ایران کے شہر مشہد کے ایک ہوٹل میں قیام کے دوران فون کال اور موبائل ایپس پر دھمکی آمیز پیغامات موصول ہوئے۔

انہوں نے کہا کہ وہ ان دھمکیوں میں ملوث افراد کے نام اور ثبوت جلد ہی عراقی عدلیہ کے سامنے پیش کریں گے تاکہ ان کے خلاف قانونی کارروائی کی جا سکے۔