صدر ٹرمپ کا شامی صدر پر اسرائیل سے تعلقات معمول پر لانے اور غیرملکی جنگجوؤں کے انخلا پر زور

ریاض (ڈیلی اردو) امریکی صدر ڈونلڈ ٹرمپ نے سعودی عرب میں شام کے عبوری صدر احمد الشرح سے ملاقات کے دوران ان پر زور دیا ہے کہ وہ اسرائیل سے تعلقات معمول پر لانے کے لیے ابراہام اکارڈز پر دستخط کریں اور شام سے تمام غیرملکی ’دہشتگردوں‘ کو نکالنے کے اقدامات کریں۔

وائٹ ہاؤس کی ترجمان کیرولائن لیویٹ کے مطابق اس ملاقات میں صدر ٹرمپ نے شام کے لیے ایک “تاریخی موقع” کی نشاندہی کرتے ہوئے کہا کہ شامی قیادت خطے میں امن و استحکام کا نیا باب رقم کر سکتی ہے۔

صدر ٹرمپ نے شامی قیادت کو پانچ اہم نکات پر عملدرآمد کی ہدایت دی:

1. ابراہام اکارڈز پر دستخط کے ذریعے اسرائیل سے تعلقات معمول پر لانا؛

2. شام میں موجود غیرملکی دہشتگردوں کو ملک سے بےدخل کرنا؛

3. بالخصوص فلسطینی گروہوں کو ملک چھوڑنے کا حکم دینا؛

4. داعش کی واپسی کو روکنے کے لیے امریکی تعاون حاصل کرنا؛

5. شمال مشرقی شام میں موجود حراستی مراکز کی نگرانی کو سخت بنانا۔

کیرولائن کے مطابق ملاقات کے دوران روس، یوکرین اور غزہ کی صورتحال پر بھی تبادلہ خیال ہوا، جبکہ شامی صدر نے اس امید کا اظہار کیا کہ شام مشرق اور مغرب کے درمیان ایک اہم تجارتی راہداری بن سکتا ہے۔

مزید برآں، سعودی ولی عہد محمد بن سلمان اور ترک صدر رجب طیب اردوغان نے شام پر سے امریکی پابندیاں اٹھانے کے فیصلے پر ٹرمپ کا شکریہ ادا کیا۔ بن سلمان نے اس اقدام کو “دلیرانہ” قرار دیا۔

صدر ٹرمپ نے گزشتہ روز سرمایہ کاری کانفرنس سے خطاب میں بھی مشرق وسطیٰ میں اسرائیل کو تسلیم کرنے کے عمل کو فروغ دینے پر زور دیا تھا۔