ضلع کرم میں مائن دھماکہ، ایک شخص زخمی، لوئر کرم میں 2 دہشتگرد ہلاک

 کرم(ڈیلی اردو) خیبرپختونخواہ کے شورش زدہ ضلع  اپر کرم کے علاقے پیواڑ خمزے کلی میں مائن دھماکے کے نتیجے میں ایک شخص شدید زخمی ہوگیا، جسے مقامی افراد نے فوری طور پر علاج کے لیے ڈی ایچ کیو اسپتال پاراچنار منتقل کر دیا۔

پولیس کے مطابق دھماکہ تھانہ پیواڑ کی حدود میں پیش آیا، جس میں شبیر حسین ولد نوروز علی زخمی ہوئے۔ واقعے کے بعد متعلقہ اداروں نے علاقے کی جانچ شروع کردی۔ مقامی ذرائع کے مطابق پیواڑ خمزے اور گردونواح میں اس سے قبل بھی مائن دھماکوں کے واقعات پیش آچکے ہیں، جس کے باعث علاقے میں تشویش پائی جاتی ہے۔

دوسری جانب لوئر کرم میں سیکیورٹی فورسز نے انٹیلیجنس معلومات کی بنیاد پر کارروائی کرتے ہوئے دہشتگردوں کے مشتبہ ٹھکانوں کو نشانہ بنایا۔ ذرائع کے مطابق کارروائی کے دوران ڈرون نگرانی بھی کی گئی، جس کے نتیجے میں 2 دہشتگرد ہلاک جبکہ 4 دیگر زخمی ہوئے۔

ذرائع کا کہنا ہے کہ کارروائی کے بعد علاقے میں ممکنہ خطرات کے تدارک اور سیکیورٹی کو یقینی بنانے کے لیے سرچ اور سینیٹائزیشن آپریشن جاری ہے۔