طالبان نے طاقت کے زور پر قبضہ کیا تو اُن کی حکومت عالمی سطح پر تنہا ہوگی، زلمے خلیل زاد

کابل (ڈیلی اردو) امریکی نمائندہ خصوصی برائے افغان امن عمل زلمےخلیل زاد کا کہنا ہے کہ طالبان نے طاقت کے زور پر افغانستان پر قبضہ کیا تو اُن کی حکومت عالمی سطح پر تنہا ہوگی اور طالبان خود کو بین الاقوامی سطح پر تسلیم نہیں کروا سکیں گے۔

زلمے خلیل زاد نے امریکی میڈیا کو دیے گئے ایک انٹرویو میں کہا ہے کہ امریکا متحارب افغان دھڑوں کے درمیان سیاسی تصفیے کیلئے پر عزم ہے کیونکہ کوئی بھی فریق عسکری قوت کے ذریعے یہ جنگ نہیں جیت سکتا۔

انہوں نے کہا کہ افغانستان میں دیرپا امن کیلئے سیاسی معاہدہ ہونا چاہیے، امریکا اس کیلئے کوشاں رہے گا جبکہ معاہدے کے تحت طالبان افغانستان میں نئی حکومت کیلئے مذاکرات اور جامع جنگ بندی کریں۔

انہوں نے کہا کہ ماضی کی غلطی دہرانا نہیں چاہتے تھے اس لیے جانے سے پہلے طالبان کے ساتھ معاہدہ کیا، امن عمل کیلئے ایک بنیادی پیکج بنایا تاکہ یہ طویل جنگ اختتام کو پہنچے، بدقسمتی سے فریقین نے اس موقع کا اس تیز رفتاری سے فائدہ نہیں اٹھایا جو اٹھایا جانا چاہیے تھا۔

انہوں نے مزید کہا کہ افغانستان میں فریقین کے درمیان خلیج بڑھ گئی ہے اور فاصلے بڑھتے جا رہے ہیں جبکہ فریقین کے درمیان پیش رفت کے فقدان پر بہت تشویش ہے۔

زلمے خلیل زاد کا کہنا تھا کہ افغان رہنماؤں کو ایک ایسے فارمولے پر اتفاق کرنا ہو گا جس کی وسیع تر حمایت ہو۔

علاوہ ازیں انہوں نے کہا کہ افغان فوج کی مدد جاری رکھیں گے اور مستقبل میں بھی ان کی مدد کیلئے پر عزم ہیں۔