طالبان کا افغانستان میں خواتین ٹی وی میزبانوں کو چہرہ ڈھانپنے کا حکم

کابل (ویب ڈیسک) طالبان نے افغانستان میں ٹی وی نشریات کا حصہ بنانے والی تمام خواتین کو نشریات کے دوران چہرے کو نقاب سے ڈھانپنے کا حکم دیا ہے۔

افغان وزارت امربالمعروف ونہی عن المنکر کی جانب سے جاری کردہ حکم میں کہا گیا ہے کہ اس کا اطلاق افغانستان میں تمام میڈیا اداروں میں کام کرنے والی تمام خواتین پر ہوگا۔

The Islamic Emirate in a new order demanded all female presenters working in all TV channels to cover their faces while presenting programs… 1/2#TOLOnews

— TOLOnews (@TOLOnews) May 19, 2022

وزارت نے مزید کہا کہ یہ فیصلہ حتمی ہے اور اس میں کوئی تبدیلی نہیں ہوگی۔

خیال رہے کہ اس سے قبل 7 مئی کو طالبان کے سپریم لیڈر ملا ہیبت اللہ اخوندزادہ نے عوامی مقامات پر تمام خواتین کو مکمل برقع پہننے کا حکم دیا تھا۔

اس موقع پر انہوں نے کہا کہ خواتین عوامی مقامات پر سر سے پاؤں تک ڈھانپنے والا برقع پہنیں۔

رپورٹ کے مطابق ملا ہیبت اللہ اخوندزادہ نے اپنے بیان میں کہا کہ سر سے پاؤں تک ڈھانپنے والا برقع روایتی اور محترم ہے۔

قبل ازیں نومبر 2021 میں طالبان نے ٹی وی ڈراموں اور فلموں میں اداکاراؤں کو دکھانے پر پابندی لگائی تھی جبکہ خواتین رپورٹرز کو رپورٹنگ کے دوران حجاب پہننے کی ہدایت جاری کی گئی تھی۔