عراقچی کے 12 علاقائی وزرائے خارجہ سے رابطے، خطے کی سلامتی بیرونی طاقتوں کے بجائے علاقائی ممالک کے ہاتھ میں دینے پر زور

تہران (ڈیلی اردو) ایران کے وزیر خارجہ عباس عراقچی نے گزشتہ 48 گھنٹوں کے دوران 12 ممالک کے وزرائے خارجہ سے ٹیلی فونک رابطے کیے ہیں، جن میں مشرق وسطیٰ کی بدلتی ہوئی صورتحال، امریکہ اور اسرائیل کے اقدامات اور خطے میں کشیدگی کو مزید بڑھنے سے روکنے کے امکانات پر تبادلۂ خیال کیا گیا۔

ایرانی وزیر خارجہ کے مطابق ان رابطوں میں عمان، مصر، اردن، سعودی عرب، قطر، قبرص، ترکیہ، کویت، متحدہ عرب امارات، تیونس، عراق اور پاکستان کے وزرائے خارجہ شامل تھے۔ عراقچی نے کہا کہ گفتگو کے دوران انہوں نے ایران کا مؤقف پیش کرتے ہوئے قومی خودمختاری کے احترام، دھمکیوں اور جارحیت کے خاتمے اور خطے کے معاملات میں بیرونی مداخلت سے گریز کی ضرورت پر زور دیا۔

عراقچی نے کہا کہ ایران اپنی قومی خودمختاری اور سلامتی کے دفاع کا حق محفوظ رکھتا ہے۔ ان کے بقول خطے کے ممالک کو چاہیے کہ وہ مشترکہ مشاورت کے ذریعے اپنے سلامتی کے انتظامات تشکیل دیں اور ایسے اقدامات سے گریز کریں جن سے کشیدگی یا عدم استحکام میں اضافہ ہو۔

علاقائی سفارتی رابطوں میں تیزی ایسے وقت میں سامنے آئی ہے جب امریکہ اور ایران کے درمیان کشیدگی کم کرنے کے لیے قطر کی ثالثی میں کوششیں جاری ہیں۔ عالمی میڈیا کی رپورٹس کے مطابق واشنگٹن اور تہران کے درمیان جوہری پروگرام، پابندیوں اور آبنائے ہرمز کی صورتحال سمیت متعدد معاملات پر اختلافات برقرار ہیں۔ امریکی صدر ڈونلڈ ٹرمپ نے بھی 7 نومبر کو ایران کے قریب جزیرہ قشم کے علاقے میں ایرانی فضائی دفاعی نظام کے خلاف محدود حملوں کی تصدیق کی ہے، جس سے خطے میں مزید کشیدگی کے خدشات بڑھ گئے ہیں۔