غزہ: اسرائیلی حملوں میں 6 بچوں سمیت 21 افراد ہلاک

غزہ (ڈیلی اردو/روئٹرز) حماس کے طبی ذرائع کے مطابق بدھ کے روز اسرائیلی حملوں میں کم از کم 21 فلسطینی ہلاک ہو گئے، جن میں چھ بچے بھی شامل ہیں۔ اس پیش رفت کو جنگ بندی کمزور کرنے والی ایک تازہ ترین پرتشدد کارروائی قرار دیا جا رہا ہے۔

خبر رساں ایجنسی روئٹرز کے مطابق ہلاک ہونے والوں میں ایک طبی کارکن بھی شامل تھا، جو جنوبی شہر خان یونس میں حملے کے متاثرین کی مدد کے لیے پہنچا تھا لیکن اسی مقام پر دوسرے حملے میں وہ خود ہلاک ہو گیا۔

دیگر حملے شمال میں غزہ سٹی میں ہوئے، جہاں طبی حکام کے مطابق پانچ ماہ کا ایک بچہ بھی ہلاک ہوا۔

اسرائیلی فوج کا کہنا ہے کہ حملے اس وقت کیے گئے جب عسکریت پسندوں نے حماس کے ساتھ جنگ بندی لائن کے قریب کام کرنے والے اسرائیلی فوجیوں پر فائرنگ کی، جس کے نتیجے میں ایک فوجی شدید زخمی ہو گیا۔ فوج نے اس فائرنگ کو جنگ بندی معاہدے کی خلاف ورزی قرار دیا۔

یہ حملے اس واقعے کے تین دن بعد ہوئے، جب اسرائیل نے غزہ کی مصر کے ساتھ مرکزی سرحدی گزرگاہ دوبارہ کھولی تھی۔

اس دوران رفح بارڈر سے مصر جانے کی تیاری کرنے والے فلسطینی مریضوں کو بتایا گیا کہ اسرائیل نے مریضوں کی سرحد پار منتقلی مؤخر کر دی ہے، تاہم چند گھنٹوں بعد انہیں دوبارہ تیاری کرنے کو کہا گیا۔

اسرائیلی ادارے ’کوگاٹ‘ نے کہا کہ رفح گزرگاہ کھلی ہے، مگر عالمی ادارہ صحت (ڈبلیو ایچ او) سے مریضوں کی منتقلی کے لیے ضروری تفصیلات موصول نہیں ہوئیں۔ 

ڈبلیو ایچ او نے روئٹرز کی تبصرے کی درخواست پر فوری جواب نہیں دیا۔

یاد رہے کہ رفح بارڈر سے آمدورفت کی بحالی اکتوبر میں ہونے والی جنگ بندی کی شرائط میں شامل تھی، جس میں اسرائیل اور حماس کے درمیان لڑائی روکنے کے لیے امریکی صدر ڈونلڈ ٹرمپ کے منصوبے کا پہلا مرحلہ طے پایا تھا۔