غزہ: جنگ بندی کیلئے سفارتی کوششیں جاری، جنوبی لبنان میں اسرائیلی حملے

تل ابیب (ڈیلی اردو/ڈی پی اے/رائٹرز/اے ایف پی) اسرائیلی فوج کا کہنا ہے کہ اس نے غزہ میں جمرات کے روز متعدد مقامات پر بمباری کی، دوسری جانب عالمی سفارت کاروں کی کوشش ہے کہ کسی طرح سے اس ساحلی پٹی میں فائربندی کے معاہدے تک پہنچا جائے۔

غزہ میں جنگ بندی کے لیے عالمی سطح پر سفارت کاری کی کوششوں کے دوران اسرائیل نے اس محصور ساحلی پٹی پر حملوں میں کوئی کمی نہیں کی۔ فلسطینی عسکریت پسند تنظیم اور غزہ کی منتظم حماس کا کا کہنا ہے کہ اسرائیلی عسکری کارروائیوں کے آغاز سے اب تک غزہ میں ہلاک ہونے والوں کی تعداد اب بیس ہزار سے تجاوز کر چکی ہے۔

‘افسوس ناک اور شرم ناک سنگ میل‘

اقوام متحدہ کے سربراہ برائے انسانی امداد مارٹن گریفتھس کے مطابق غزہ میں ہلاکتوں کی تعداد ”افسوس ناک اور شرم ناک سنگ میل‘‘ عبور کر چکی ہے۔ دوسری جانب اقوام متحدہ کی سلامتی کونسل اس کوشش میں ہے کہ کسی طرح سے غزہ میں جاری اس جنگ میں وقتی سیزفائر کا راستہ نکالا جائے۔

اسرائیلی کارروائیوں میں تیزی

اسرائیلی فوج کے مطابق گزشتہ چوبیس گھنٹوں کے دوران غزہ میں 230 مقامات پر حملے کیے گئے، جن میں ایک راکٹ لانچنگ سائٹ کو بھی نشانہ بنایا گیا۔ بتایا گیا ہے کہ زمینی فورسز نے جبالیہ کے علاقے کے قریب ایک اسکول سے ہتھیار برآمد کیے ہیں۔

واضح رہے کہ اس جنگ کا آغاز سات اکتوبر کو اسرائیل پر حماس کے دہشت گردانہ حملے کے بعد ہوا تھا، جس میں گیارہ سو چالیس اسرائیلی شہری ہلاک ہو گئے تھے، جن میں اکثریت عام شہریوں کی تھی۔ اس کے علاوہ حماس کے جنگجو قریب ڈھائی سو افراد کو یرغمال بنا کر اپنے ساتھ لے گئے تھے۔

حماس کے میڈیا دفتر نے بتایا کہ اب تک فلسطینی سرزمین پر اسرائیلی عسکری کارروائیوں میں ہلاک ہونے والوں کی مجموعی تعداد بیس ہزار سے زائد ہو چکی ہے، جن میں سے آٹھ ہزار بچے اور چھ ہزار دو سو خواتین تھیں۔

خان یونس سے فلسطینی شہریوں کے انخلا کا حکم

اقوام متحدہ نے کہا ہے کہ اسرائیل نے جنوبی غزہ میں خان یونس کے ایک بڑے علاقے کے رہائشیوں کو وہاں سے نکل جانے کا حکم دیا ہے۔ بتایا گیا ہے کہ خان یونس کے علاقے میں ایک لاکھ چالیس ہزار سے زائد بے گھر افراد پناہ لیے ہوئے ہیں۔

اسرائیل نے شمالی غزہ سے لوگوں کے انخلا کے احکامات جاری کیے تھے، جس کے بعد لاکھوں افراد جنوبی غزہ کی جانب منتقل ہو گئے تھے، تاہم اب اسرائیل جنوبی غزہ کے مختلف علاقوں کی جانب پیش قدمی کر رہا ہے۔ اقوام متحدہ کے مطابق ان بے گھر افراد کے لیے پناہ کی جگہیں سکڑتی جا رہی ہیں۔

جنوبی لبنان میں اسرائیلی حملے

جنوبی لبنان میں اسرائیلی شیلنگ کے نتیجے میں ایک معمر خاتون ہلاک ہو گئی۔ یہ واقعہ جمعرات کے روز مارون الراس کے علاقے میں پیش آیا۔ بتایا گیا ہے کہ اس واقعے میں اس خاتون کا شوہر زخمی ہو گیا۔ اسرائیلی فوج کے مطابق جمعرات کو اسرائیلی لڑاکا طیاروں نے جنوبی لبنان میں شیعہ عسکری تنظیم حزب اللہ کے ٹھکانوں کو نشانہ بنایا۔

اسرائیلی بیان میں کہا گیا ہے کہ ان تازہ کارروائیوں میں حزب اللہ کی ایک راکٹ لانچنگ سائٹ تباہ کر دی گئی۔ 7 اکتوبر کو حماس کے دہشت گردانہ حملے کے بعد سے اسرائیل اور لبنانی شیعہ عسکری تنظیم حزب اللہ کے درمیان بھی وقفے وقفے سے جھڑپیں جاری ہیں۔