غزہ میں اسرائیلی حملے میں دو افراد ہلاک

غزہ (ڈیلی اردو/وافا) فلسطینی طبی ذرائع کے مطابق غزہ کے علاقے ابسان الکبیرہ پر اسرائیلی حملے میں دو افراد ہلاک اور تین زخمی ہوئے ہیں۔ یہ واقعہ پیر کے روز پیش آیا۔

خان یونس کے ناصر ہسپتال کے ذرائع نے بتایا کہ ہلاک ہونے والوں میں ایک مرد شامل تھا۔

اسرائیلی فوج کا کہنا ہے کہ نشانہ بنائے گئے افراد نے ’’یلو لائن‘‘ عبور کی تھی، یہ وہ حدِ فاصل ہے جہاں اسرائیلی فوج جنگ بندی کے معاہدے کے تحت پیچھے ہٹ گئی تھی۔

ابسان الکبیرہ، جو خان یونس کے مشرق میں واقع ہے، تاحال اسرائیلی فوجی کنٹرول میں ہے اور ’’یلو لائن‘‘ کے پیچھے شمار ہوتا ہے۔

اسرائیلی دفاعی افواج کے مطابق فلسطینیوں نے یلو لائن کے قریب ’’مشکوک سرگرمیاں‘‘ کیں، جس کے بعد ’’خطرہ ختم کرنے‘‘ کے لیے انہیں نشانہ بنایا گیا۔

فلسطینی نیوز ایجنسی وافا کے مطابق، اسرائیلی فوج نے ابسان الکبیرہ میں لوگوں کے ایک گروپ پر ڈرون سے حملہ کیا، جو جنگ بندی کے بعد اپنے تباہ شدہ گھروں کا معائنہ کر رہے تھے۔ رپورٹس میں کہا گیا ہے کہ کچھ افراد شدید زخمی بھی ہوئے۔ تاہم، دونوں اطراف کے دعوؤں کی آزادانہ طور پر تصدیق نہیں ہو سکی۔

یاد رہے کہ اسرائیل اور فلسطینی تنظیم حماس کے درمیان موجودہ جنگ بندی 10 اکتوبر کو امریکی صدر ڈونلڈ ٹرمپ کے 20 نکاتی امن منصوبے کے تحت نافذ ہوئی تھی۔

اس معاہدے کے مطابق حماس نے تمام زندہ مغویوں کو رہا کر دیا تھا جنہیں اس گروہ اور دیگر عسکریت پسندوں نے 7 اکتوبر 2023 کو اسرائیل پر حملے کے بعد یرغمال بنایا تھا۔ تاہم، ان 28 مغویوں میں سے تقریباً نصف کی لاشیں اب تک واپس نہیں لوٹائی گئیں۔

اسرائیل کا الزام ہے کہ حماس تاخیری حربے استعمال کر رہی ہے، جبکہ انتہا پسند گروپ کا کہنا ہے کہ دو سال سے زائد عرصے سے جاری اسرائیلی بمباری سے غزہ کے ملبے تلے لاشوں کی تلاش اور نکالنا انتہائی مشکل ہو چکا ہے۔