قلعہ عبداللہ : مقامی افراد اور بی ایل اے سے وابستہ مسلح افراد کے درمیان جھڑپ، 2 ہلاک

قلعہ عبداللہ (ڈیلی اردو) بلوچستان کے شورش زدہ ضلع قلعہ عبداللہ کے علاقے گلستان کے مقام ملیزئی محمد زئی میں مقامی پشتونوں اور بلوچ لبریشن آرمی (بی ایل اے) سے وابستہ مسلح افراد کے درمیان جھڑپ کی اطلاع ہے، جس میں 2 افراد کے ہلاک ہونے کا دعویٰ کیا گیا ہے۔

مقامی ذرائع کے مطابق علاقے کے رہائشیوں اور بی ایل اے سے وابستہ افراد کے درمیان پیدا ہونے والے تنازع کے بعد فائرنگ کا تبادلہ ہوا۔ تاہم جھڑپ شروع ہونے کی اصل وجہ اور اس کے مکمل حالات فوری طور پر واضح نہیں ہوسکے۔

ذرائع کا کہنا ہے کہ فائرنگ کے دوران بی ایل اے سے وابستہ 2 افراد ہلاک ہوئے، تاہم ہلاک ہونے والوں کی شناخت اور تنظیم سے ان کی وابستگی کی آزادانہ طور پر تصدیق نہیں ہوسکی۔

واقعے کے بعد علاقے میں کشیدگی کی اطلاعات ہیں، جبکہ مقامی افراد کے ممکنہ جانی نقصان سے متعلق بھی مزید تفصیلات سامنے نہیں آسکیں۔ واقعے کی مکمل صورتحال واضح ہونے کے لیے مزید معلومات کا انتظار ہے۔