لاہور: انار کلی دھماکے میں ملوث بلوچ نیشنلسٹ آرمی کا مبینہ دہشت گرد گرفتار

لاہور (ڈیلی اردو) انار کلی بم دھماکے میں ملوث کالعدم بلوچ نیشنلسٹ آرمی (بی این اے) کا مبینہ دہشت گرد لاہور سے گرفتار کرلیا گیا۔

سی ٹی ڈی ذرائع کے مطابق لاہور کے انارکلی بازار میں ہونے وا لے بم دھماکے میں ملوث ایک اور دہشت گرد کو لاہور سے گرفتار کرلیا گیا ہے، دہشت گرد کو بلوچستان کے گرفتار ہونے والے اس کے ساتھی کی نشاندہی پر گرفتار کیا گیا ہے، انار کلی دھماکے کے مرکزی ملزم بلوچستان سے گرفتار ہوئے تھے۔

تفتیشی ذرائع کے مطابق گرفتار دہشت گرد کو قانون نافذ کرنے والے اداروں نے سی ٹی ڈی کے حوالے کر دیا ہے، دہشت گرد کا نام سیف الرحمان ہے جو ٹرک اڈے میں ملازمت کرتا تھا، اور 20 جنوری کو دھماکے کے بعد ٹرک اڈے کے پاس روپوش ہوگیا تھا، دہشت گرد کا تعلق بلوچستان کی کالعدم تنظیم بلوچ نیشنلسٹ آرمی (بی این اے) سے ہے، اور لاہور دھماکے کے لئے دھماکا خیز مواد بھی ٹرک میں بلوچستان سے سپلائی کیا گیا۔

گرفتار دہشت گرد سیف الرحمان کو سی ٹی ڈی نے انسداد دہشت گردی لاہور کی خصوصی عدالت میں پیش کردیا ہے۔ تفتیشی افسر نے عدالت سے استدعا کی کہ گرفتار دہشت گرد سے واقعے سے متعلق تفتیش درکار ہے 14 روزہ جسمانی ریمانڈ دیا جائے۔ عدالت نے کاروائی مکمل کرتے ہوئے ملزم کا 12 اپریل تک جسمانی ریمانڈ منظور کرلیا۔

خیال رہے کہ رواں برس 20 جنوری کو پنجاب کے صوبائی حکومت لاہور میں انار کلی میں ہونے والے دھماکے میں تین افراد ہلاک اور 29 افراد زخمی ہوئے تھے۔ اس دھماکے کی ذمہ داری بلوچ تنظیم بلوچ نیشنلسٹ آرمی (بی این اے) نے قبول کی تھی۔