لبنان میں اسرائیل کا فضائی حملہ، حزب اللہ کے تین جنگجو ہلاک

بیروت (ڈیلی اردو) لبنان کے جنوبی ساحلی شہر صیدا کے قریب پیر کے روز ایک اسرائیلی فضائی حملے میں تین افراد ہلاک ہو گئے۔ اسرائیل کا کہنا ہے کہ حملے میں حزب اللہ کے جنگجو کو نشانہ بنایا گیا۔

لبنانی سرکاری میڈیا کے مطابق یہ واقعہ اس ڈیڈ لائن سے چند دن قبل پیش آیا، جس کے تحت لبنانی فوج کو سرحدی علاقوں میں حزب اللہ کو غیر مسلح کرنا ہے۔ اسرائیل نومبر 2024 میں ہونے والی جنگ بندی کے باوجود لبنان پر حملے جاری رکھے ہوئے ہے اور دعویٰ کرتا ہے کہ وہ ایران کے حمایت یافتہ مسلح گروہ حزب اللہ کو نشانہ بنا رہا ہے، جس پر دوبارہ مسلح ہونے کا الزام لگاتا ہے۔

نیشنل نیوز ایجنسی کے مطابق اسرائیلی ڈرون نے صیدا سے تقریباً 10 کلومیٹر کے فاصلے پر ایک گاڑی کو نشانہ بنایا، جس کے نتیجے میں اس میں سوار تین افراد ہلاک ہو گئے۔ اسرائیلی فوج کے بیان میں کہا گیا کہ "صیدا کے علاقے میں حزب اللہ کے متعدد جنگجو کو نشانہ بنایا گیا"۔

امریکی دباؤ اور اسرائیلی حملوں میں اضافے کے خدشات کے پیش نظر لبنان نے حزب اللہ کو غیر مسلح کرنے کا عزم ظاہر کیا، جس کا آغاز جنوبی علاقوں سے کیا جائے گا۔

یہ تازہ حملہ ایسے وقت میں ہوا جب جمعے کے روز لبنانی اور اسرائیلی نمائندے جنگ بندی کی نگرانی کرنے والی کمیٹی کے اجلاس میں دوسری بار شریک ہوئے۔ اس سے قبل رواں ماہ دونوں فریقین نے اسی کمیٹی کی نگرانی میں دہائیوں بعد پہلی براہِ راست بات چیت کی تھی۔