لوئر دیر میں سیکیورٹی فورسز کا آپریشن: 10 عسکریت پسند اور 7 فوجی اہلکار ہلاک

راولپنڈی (ک م) پاکستان کے شورش زدہ صوبے خیبرپختونخوا کے ضلع لوئر دیر کے علاقے لال قلعہ میدان میں سیکیورٹی فورسز نے کارروائی کرتے ہوئے 10 عسکریت پسندوں کو ہلاک کرنے کا دعویٰ کیا ہے۔ اس آپریشن کے دوران 7 فوجی اہلکار بھی ہلاک ہوئے جبکہ یرغمال بنائے گئے شہریوں کو بحفاظت نکال لیا گیا۔

پاکستانی فوج کے شعبہ تعلقات عامہ (آئی ایس پی آر) کے مطابق یہ کارروائی 11 ستمبر 2025 کو کی گئی، جس میں عسکریت پسندوں کی موجودگی کی خفیہ اطلاع پر فورسز نے آپریشن کیا۔

آئی ایس پی آر کا کہنا ہے کہ فورسز نے عسکریت پسندوں کے ٹھکانے کو مؤثر نشانہ بنایا اور فائرنگ کے شدید تبادلے کے بعد 10 افراد ہلاک ہوگئے۔ تاہم اس دوران 7 فوجی اہلکار بھی ہلاک ہوئے جنہیں یرغمال شہریوں کی جانیں بچاتے ہوئے نقصان اٹھانا پڑا۔

فوج کے مطابق ہلاک ہونے والوں میں شمالی وزیرستان کے 39 سالہ نائیک عبدالجلیل، لکی مروت کے 38 سالہ نائیک گل جان، لکی مروت کے 28 سالہ لانس نائیک عظمت اللہ، ضلع خیبر کے 28 سالہ سپاہی عبدالملک، مالاکنڈ کے 27 سالہ سپاہی محمد امجد، صوابی کے 23 سالہ سپاہی محمد داؤد اور ڈیرہ اسماعیل خان کے 21 سالہ سپاہی ۔فضل قیوم شامل ہے 

آئی ایس پی آر نے الزام عائد کیا ہے کہ ان کارروائیوں میں افغان شہری بھی ملوث ہیں۔ فوج کے مطابق پاکستان توقع کرتا ہے کہ افغان عبوری حکومت اپنی سرزمین کو دہشت گردوں کے لیے استعمال ہونے سے روکے گی۔

فوج نے بتایا کہ علاقے میں مزید کارروائی جاری ہے تاکہ کسی بھی باقی ماندہ عسکریت پسند کو ختم کیا جا سکے۔ آئی ایس پی آر نے اس عزم کا اعادہ کیا کہ دہشت گردی کے خلاف جنگ جاری رہے گی اور اس طرح کی قربانیاں فورسز کے حوصلے بلند کرتی ہیں۔