لوئر دیر میں فورسز اور طالبان کے مابین جھڑپیں، 7 پاکستانی اہلکار ہلاک، ایک لاپتہ، 13 زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع دیر کے سرحدی علاقے سر بانڈہ اور لالُو جنگلات میں سکیورٹی فورسز نے انٹیلیجنس بیسڈ سرچ اور کلیئرنس آپریشن کیا، جس کے دوران شدید جھڑپیں ہوئیں۔

سیکیورٹی ذرائع کے مطابق فورسز کو اطلاع ملی تھی کہ کالعدم تحریک طالبان پاکستان کے شدت پسند علاقے میں موجود ہیں۔ سکیورٹی اہلکار جب کارروائی کے لیے پہنچے تو شدت پسندوں نے فورسز پر فائرنگ شروع کر دی، جس کے نتیجے میں کم از کم دو شدت پسند ہلاک ہو گئے۔

دوسری جانب، اس آپریشن کے دوران کم از کم 7 سکیورٹی اہلکار ہلاک اور ایک لاپتہ ہو گیا، جبکہ 13 اہلکار زخمی بھی ہوئے۔ پاکستانی فورسز کی کارروائی پورے دن جاری رہی اور علاقے میں اضافی سکیورٹی بھی تعینات کر دی گئی ہے۔

سکیورٹی حکام کا کہنا ہے کہ آپریشن کا مقصد علاقے سے دہشت گردوں کا مکمل خاتمہ اور مقامی لوگوں کی حفاظت ہے۔ مزید تفصیلات کا انتظار ہے اور فورسز نے علاقے میں سرچ آپریشنز جاری رکھے ہوئے ہیں۔

<hr />

نوٹ: یہ ابتدائی خبر ہے جس میں تفصیلات شامل کی جا رہی ہیں۔