مالاکنڈ ڈویژن میں سیکورٹی فورسز کا آپریشن، کمانڈر سمیت چار دہشت گرد ہلاک

سوات (نمائندہ ڈیلی اردو) صوبہ خیبر پختونخوا کے ضلع مالاکنڈ ڈویژن کے علاقے شاہ کوٹ میں دہشت گردوں کے خلاف کارروائی کے دوران سی ٹی ڈی اور دیگر سیکیورٹی فورسز نے چار خطرناک دہشت گردوں کو ہلاک کر دیا۔

ڈیلی اردو کے مطابق بٹ خیلہ کے علاقے شاہکوٹ کے قریب خوگدرا میں سکیورٹی فورسز اور مسلح شدت پسندوں کے مابین ہونے والی فائرنگ کے تبادلے میں تین دہشت گرد مارے گئے۔

سرکاری ذرائع کے مطابق ہلاک ہونے والوں میں ایک کمانڈر عبداللہ، زکریا اور رضوان شامل ہیں جو مختلف کارروائیوں میں مطلوب تھے۔

ذرائع نے ڈیلی اردو کو بتایا کہ آپریشن کے دوران دہشت گردوں نے شدید مزاحمت کی لیکن سیکورٹی فورسز کے اہلکاروں نے بہادری کا مظاہرہ کیا۔

سی ٹی ڈی کے مطابق علاقے میں سرچ آپریشن بھی کیا گیا ہے۔ سرچ آپریشن کے دوران قریبی علاقے سے ایک اور دہشت گرد کی لاش بھی ملی ہے۔

سی ٹی ڈی نے چاروں لاشیں تحویل میں لے لیں۔

ذرائع کا یہ بھی کہنا تھا کہ اِس سلسلے میں مزید تحقیقات بھی کی جا رہی ہیں تاکہ دہشت گردوں کے کسی ممکنہ نیٹ ورک کا سراغ لگایا جا سکے۔