محرم الحرام: سندھ میں 137 علما کرام اور ذاکرین پر پابندی عائد

کراچی (ڈیلی اردو) محکمہ داخلہ سندھ نے محرم الحرام میں امن و امان قائم کرنے کے لیے آئی جی کی سفارش پر کراچی سمیت 11 اضلاع کے 137 علما کرام و ذاکرین کی تقاریر اور سفر پر پابندی عائد کردی۔

آئی جی سندھ کی جانب سے خط میں لکھا گیا ہے کہ سندھ بھر کے 11 اضلاع کے 137 علمائے کرام اشتعال انگیز تقاریر سمیت نقص امن کیلئے خطرہ ہیں لہذا محرم الحرام کے مہینے میں ان علما کرام پر پابندی لگائی جائے۔

محکمہ داخلہ سندھ نے آئی جی کی سفارش پر محرم الحرام کے دوران علما کرام پر پابندی کا نوٹی فکیشن جاری کردیا، جس کے مطابق سندھ بھر کے 11 اضلاع کے 137 علمائے کرام پر سفری پابندی بھی لگائی گئی ہے۔

کراچی کے اضلاع ملیر، ایسٹ کے 14 علمائے کرام پر پابندی لگائی گئی ہے اس کے علاوہ جیکب آباد، لاڑکانہ، قمبر شہداد کوٹ، لاڑکانہ، حیدرآباد، نواب شاہ سے تعلق رکھنے والے علمائے کرام پر پابندی سفری پابندی لگادی گئی ہے۔