مستونگ میں سیکیورٹی فورسز کے قافلے کے قریب دھماکہ، ایک اہلکار ہلاک، 10 زخمی

مستونگ(ڈیلی اردو) بلوچستان کے شورش زدہ ضلع مستونگ کے علاقے کھڈکوچہ میں گرو کے مقام پر قومی شاہراہ پر سیکیورٹی فورسز کے قافلے کو مبینہ طور پر دھماکے کا نشانہ بنایا گیا، جس کے نتیجے میں ایک سیکیورٹی اہلکار ہلاک جبکہ 10 اہلکاروں کے زخمی ہونے کی اطلاعات ہیں۔

ریسکیو ذرائع کے مطابق دھماکے کے بعد ہلاک اہلکار کی لاش اور زخمیوں کو شہید نواب غوث بخش رئیسانی میموریل ہسپتال منتقل کیا گیا، جہاں زخمیوں کو طبی امداد فراہم کی جا رہی ہے۔

واقعے کے بعد قومی شاہراہ کو دونوں اطراف سے ٹریفک کے لیے بند کر دیا گیا، جبکہ علاقے میں فائرنگ کی اطلاعات بھی موصول ہوئی ہیں۔ سیکیورٹی فورسز نے جائے وقوعہ کو گھیرے میں لے کر سرچ آپریشن شروع کر دیا ہے۔

دھماکے کی نوعیت اور اس میں استعمال ہونے والے مواد سے متعلق مزید تفصیلات تاحال سامنے نہیں آسکیں، جبکہ واقعے کی تحقیقات جاری ہیں۔