مقبوضہ کشمیر کے مختلف علاقوں میں شدید برفباری، 4 بھارتی فوجیوں سمیت 9 افراد ہلاک

سرینگر (ڈیلی اردو/کے ایس ایم) مقبوضہ کشمیر میں ہونے والی شدید برفباری ک باعث بھارتی فوج کے 4 اہلکاروں سمیت 9 افراد ہلاک ہوگئے۔

کشمیر میڈیا سروس کے مطابق مقبوضہ کشمیر میں سردیوں کے آغاز سے ہی برفباری کا سلسلہ جاری ہے جس سے معمولات زندگی معطل ہوکر رہ گئے ہیں جبکہ مختلف واقعات میں 9 افراد ہلاک ہوگئے۔

ضلع کپواڑا میں طوفان کی زد میں آکر بھارتی فوج کے 2 اہلکار ہلاک ہوئے جبکہ دھند کے باعث ٹریفک حادثے میں بھی 2 اہلکار ہلاک ہوئے اور مختلف واقعات میں 5 افراد ہلاک ہوئے۔

محکمہ موسمیات کا کہنا ہے کہ سرینگر میں ایک فٹ برف پڑی ، کپواڑا، شوپیاں، گندبال اور بارہ مولا میں 3 سے 4 فٹ برفباری ریکارڈ کی گئی۔ خراب موسم کے باعث تعلیمی ادارے بندہیں اور مواصلاتی نظام تباہ ہوکر رہ گیاہے۔

مقبوضہ وادی کو جانے والی تمام مرکزی شاہراہیں، سری نگر جموں ہائی وے، سری نگر پونچھ ہائی وے اور سری نگر کارگل ہائی وے برفباری کے باعث بند ہوگئی ہیں جہاں 2 ہزار سے زائد گاڑیاں پھنس گئی ہیں۔