ملاکنڈ ڈویژن: درگئی میں نامعلوم افراد کی فائرنگ، وزیر اعلیٰ خیبرپختونخوا کے سیکیورٹی انچارج سمیت 4 افراد ہلاک، 2 زخمی

درگئی (ڈیلی اردو) صوبہ خیبرپختونخوا کے ضلع مالاکنڈ کی تحصیل درگئی کے علاقے ہریانکوٹ میں وزیر اعلیٰ خیبرپختونخوا کے سیکیورٹی انچارج پر حملہ ہوا ہے جس میں سیکیورٹی انچارج وکیل خان بیٹے اور دو ساتھی سمیت ہلاک ہوگئے۔

لیویز ذرائع کے مطابق فائرنگ سے وکیل خان کے ایک بیٹے سمیت دو افراد زخمی ہوئے، لاشوں اور زخمیوں کو ٹی ایچ کیو ہسپتال درگئی منتقل کردیا گیا ہے۔

لیویز ذرائع کے مطابق مقتولین دو موٹرسائیکلوں پر گھر جارہے تھے کہ ان پر نامعلوم افراد نے فائرنگ کی۔

ذرائع کے مطابق ایک موٹرسائیکل پر وکیل خان اپنے دونوں ساتھیوں سمیت سوار تھے، جبکہ دوسری موٹر سائکل پر ان کا ایک ساتھی سوار تھا۔

مقتول وکیل خان کے بھائی کو خبر ملی تو وہ صدمہ برداشت نہ کرسکے اور دل کا دورہ پڑنے سے چل بسے۔

فائرنگ کے واقعے کے بعد علاقہ مکینوں نے درگئی میں احتجاج کرتے ہوئے روڈ بلاک کردیا۔