ملتان: دیرینہ دشمنی، جلالپور میں قتل 9 افراد کی نماز جنازہ ادا کر دی گئی

ملتان (ویب ڈیسک) ملتان کی تحصیل جلالپور پیروالا میں فائرنگ سے جاں بحق ہونے والے 10 افراد میں سے 9 افراد کی نماز جنازہ ادا کردی گئی۔

پولیس کے مطابق جاں بحق ہونے والے کالا جعفر کے قریبی رشتے دار اختر عباس کی مدعیت میں اٹھارہ نامزد اور پانچ نامعلوم افراد کے خلاف قتل ،اقدام قتل اور دہشت گردی کی دفعات کے تحت مقدمہ درج کر کے 6 افراد کو گرفتار کر لیا گیا۔

نماز جنازہ کے موقع پر پولیس نے جنازہ گاہ کو گھیرے رکھا اور سخت سیکورٹی میں نماز جنازہ کے بعد تدفین کی گئی جنازہ میں علاقے کے افراد نے بہت بڑی تعداد میں شرکت کی۔

ملتان کی تحصیل جلالپور پیر والا میں درینہ رنجش پر ایک ہی خاندان کے دو گروپ نے فائرنگ کرکے ایک دوسرے کے 10 افراد کو قتل اور 9 کو زخمی کر دیا تھا۔

وزیراعلیٰ پنجاب عثمان بزدار نے بھی مذکورہ واقعے کا نوٹس لیا اور آر پی او ملتان سے رپورٹ طلب کی۔

پولیس کے مطابق بستی جعفراں میں کالا جعفر گروپ کے بیس افراد نماز عید کی ادائیگی کے بعد واپس گھر ا رہے تھے کے غلام نازک گروپ کے افراد نے اندھا دھند فائرنگ کردی جس کے نتیجہ میں کالا جعفر سمیت دس افراد جاں بحق ہو گئے جاں بحق ہونے والوں میں سے سات افراد کا تعلق کالا گروپ سے جبکہ تین افراد کا تعلق غلام نازک گروپ سے ہے۔