نئی دہلی: کار بم دھماکے میں ملوث خودکش حملہ آور کے ساتھی کو گرفتار کرلیا، این آئی اے

نئی دہلی (نمائندہ ڈیلی اردو) بھارتی حکام کا کہنا ہے کہ گزشتہ ہفتے نئی دہلی میں ہونے والے کار بم دھماکے میں ملوث خودکش حملہ آور کے ایک ساتھی کو گرفتار کر لیا گیا ہے، جس کا تعلق بھارت کے زیر انتظام کشمیر سے ہے۔

بھارتی قومی انسدادِ دہشت گردی ایجنسی این آئی اے نے اتوار کے روز بتایا کہ عامر رشید علی نامی شخص کو نئی دہلی سے حراست میں لیا گیا، جس کے نام پر وہ گاڑی رجسٹرڈ تھی جسے دھماکے میں استعمال کیا گیا۔

پیر کو دارالحکومت کے قدیم علاقے اولڈ دہلی میں تاریخی لال قلعہ کے قریب ایک مصروف میٹرو اسٹیشن کے نزدیک ہونے والے دھماکے میں 13 افراد ہلاک ہوئے تھے۔ یہ بھارتی دارالحکومت میں 2011ء کے بعد پہلا خودکش حملہ تھا۔

این آئی اے کے مطابق حملہ آور اور اس کا ساتھی دونوں بھارت کے زیرِ قبضہ کشمیر سے تعلق رکھتے ہیں، جہاں حالیہ دنوں میں پولیس نے بڑے پیمانے پر چھاپے مارے ہیں۔ این آئی اے نے کہا کہ عامر رشید علی نے کار کی خریداری میں مدد کی، جسے بعد میں بارودی مواد (IED) سے بھری گاڑی کے طور پر استعمال کیا گیا۔

حملے کے ڈرائیور کی شناخت عمر النبی کے طور پر کی گئی، جو بھارت کے زیر قبضہ کشمیر کا رہائشی اور ریاست ہریانہ کی ایک یونیورسٹی میں جنرل میڈیسن کا اسسٹنٹ پروفیسر تھا۔

 این آئی اے نے عمرالنبی کی ایک اور گاڑی بھی قبضے میں لے لی ہے۔

دھماکے کے نتیجے میں 10 بے گناہ افراد ہلاک اور 32 زخمی ہوئے۔ اسپتال کے اہلکاروں کے مطابق کل 12 افراد ہلاک ہوئے، تاہم یہ واضح نہیں کہ عمر النبی بھی ہلاک شدگان میں شامل ہیں یا نہیں۔

بھارتی وزیراعظم نریندر مودی نے اس حملے کو "سازش" قرار دیا اور حملہ آوروں، ان کے ساتھیوں اور سرپرستوں کو انصاف کے کٹہرے میں لانے کا عزم ظاہر کیا۔