نوشہرہ میں دھماکا، 8 پولیس اہلکاروں سمیت 9 افراد زخمی

نوشہرہ (ڈیلی اردو) خیبر پختونخوا کے ضلع نوشہرہ میں بم کو ناکارہ بناتے ہوئے دھماکا ہوگیا جس کے نتیجے میں 8 پولیس اہلکاروں سمیت 9 افراد زخمی ہوگئے۔

نوشہرہ کے علاقے اضاخیل پایان حسن گھڑی میں پولیس کو بم کی موجودگی کی اطلاع ملی جس پر پولیس موقع پر پہنچی اور بم ڈسپوزل اسکواڈ (بی ڈی ایس) کو طلب کیا۔

بارودی مواد ناکارہ بنانے کے دوران پھٹ گیا جس کے نتیجے میں 9 افراد زخمی ہوگئے جن میں 8 پولیس اور بی ڈی ایس اہلکار جبکہ ایک عام شہری شامل ہے۔

تمام زخمیوں کو ایل آر ایچ ہسپتال منتقل کردیا گیا ہے جہاں بیشتر زخمیوں کی حالت خطرے سے باہر بتائی جاتی ہے۔ دھماکے کے شدید زخمیوں کو پشاور کے لیڈی ریڈنگ ہسپتال، جبکہ دیگر زخمیوں کو نوشہرہ ہسپتال منتقل کردیا گیا ہے

ڈی پی او نوشہرہ اور پولیس کی بھاری نفری موقع پر پہنچ گئی اور مشتبہ افراد کی تلاش کےلیے علاقے میں سرچ آپریشن بھی کیا گیا۔