یمن: تعز میں شدید لڑائی، حوثی باغیوں کی کئی محاذوں پر پیش قدمی، حکومتی فورسز کا جوابی حملہ

تعز (یمن): یمن کے صوبہ تعز میں کئی برس کی نسبت شدید ترین لڑائی میں حوثی باغیوں اور حکومتی فورسز کے درمیان مغربی تعز کے متعدد محاذوں پر گھمسان کا معرکہ جاری ہے۔ حوثیوں نے فجر کے وقت مختلف فوجی مقامات پر زمینی حملوں کے ساتھ ڈرونز اور بیلسٹک میزائل استعمال کیے، جبکہ بعض محاذوں پر ابتدائی طور پر چند مقامات پر پیش قدمی کی اطلاعات سامنے آئیں۔ حکومتی فورسز نے جوابی حملہ کرتے ہوئے بعض مقامات واپس لینے کا دعویٰ کیا ہے۔ تاہم تازہ رپورٹس میں حوثی باغیوں کے تعز شہر میں داخل ہونے کی تصدیق نہیں ہوئی؛ دستیاب اطلاعات کے مطابق لڑائی بنیادی طور پر شہر کے مغربی دیہی علاقوں اور تعز۔مخا کے درمیان محاذوں تک محدود ہے۔ذرائع  کے مطابق تعز شہر حکومتی فورسز کے پاس ہے جبکہ حوثی باغی شہر کے اردگرد شمالی علاقوں پر قابض ہیں۔

 اس وقت لڑائی تعز شہر کے مغربی اطراف کے دیہی محاذوں، مقبنہ، کدحہ، موزع، البرح اور مخا کی جانب زیادہ مرکوز ہے۔
 

مغربی تعز میں متعدد محاذوں پر حملے

حوثی باغیوں نے مغربی تعز کے طویر، الکدحہ، مقبنہ، جبل العوید اور البرح سمیت متعدد محاذوں پر بیک وقت حملے کیے۔ مقامی اور فوجی ذرائع کے مطابق ان حملوں کا مقصد حکومتی فورسز کی دفاعی لائنوں میں شگاف ڈال کر مزید علاقوں میں پیش قدمی کرنا تھا۔ لڑائی بعد ازاں الاحطوب، الکویحہ اور جبل غباری تک پھیل گئی، جہاں توپ خانے، مارٹر، درمیانے اور ہلکے ہتھیاروں کے علاوہ ڈرونز کا بھی استعمال کیا گیا۔ چینی خبر رساں ادارے شِنہوا نے بھی مغربی تعز کے انہی دیہی علاقوں میں شدید جھڑپوں کی تصدیق کی ہے۔

بعض مقامات پر حوثیوں کی پیش قدمی، پھر جوابی کارروائی

میدانی اطلاعات کے مطابق طویر سمیت بعض علاقوں میں حوثی باغیوں نے ابتدائی حملے کے دوران کچھ مقامات پر پیش قدمی کی، جس کے بعد حکومتی فورسز نے اضافی فوجی کمک پہنچائی اور جوابی حملہ شروع کیا۔ بعض ذرائع نے مقبنہ کے علاقوں میں بھی حوثیوں کے عارضی طور پر چند مقامات پر قبضے کی اطلاع دی، تاہم بعد میں حکومتی فورسز کی جانب سے ان مقامات کو دوبارہ حاصل کرنے کا دعویٰ سامنے آیا۔

ترکی کی سرکاری خبر رساں ایجنسی انادولو کے مطابق حکومتی فورسز نے کدحہ اور موزع کے بعض محاذوں پر پیش قدمی اور مغربی تعز میں کچھ مقامات واپس لینے کا دعویٰ کیا ہے۔

تعز شہر میں داخل ہونے کی تصدیق نہیں

شدید لڑائی کے باوجود حوثی باغی تعز شہر کے اندر داخل ہوگئے ہیں۔ اے ایف پی کے مطابق ہلاکتوں میں زیادہ تر حکومتی اہلکار ان محاذوں پر مارے گئے جو بندرگاہی شہر مخا اور اندرون ملک تعز شہر کے درمیان واقع ہیں، جبکہ الجزیرہ کی حالیہ صورتحال کے مطابق تعز شہر بدستور حکومتی فورسز کے کنٹرول میں ہے۔ اس لیے موجودہ صورتحال کو تعز شہر پر حوثیوں کا قبضہ یا شہر میں داخلہ قرار دینا قبل از وقت ہوگا۔

14 بیلسٹک میزائل اور ڈرون حملے

میدانی کشیدگی کے ساتھ حوثی باغیوں نے مغربی ساحلی علاقوں پر تقریباً 14 بیلسٹک میزائل فائر کیے۔ یمنی فوج کے مطابق میزائلوں کا رخ تعز کے ساحلی علاقوں، خصوصاً مخا، اور صوبہ حدیدہ کے الخوخہ کی جانب تھا۔ ان حملوں کے ساتھ ڈرونز بھی استعمال کیے گئے، جن میں سے متعدد کو حکومتی فضائی دفاع نے مار گرانے کا دعویٰ کیا ہے۔ 

مخا بندرگاہ اور الوازعیہ پل بھی نشانے پر

حملوں کے دوران مخا بندرگاہ کے قریب دو بارود سے لدے حوثی کشتیوں کے دھماکے کی اطلاعات سامنے آئیں، جبکہ حکومتی ذرائع نے الوازعیہ پل کو بھی بیلسٹک میزائل سے نشانہ بنائے جانے کا دعویٰ کیا۔ انادولو کے مطابق یہ پل مخا کو تعز شہر سے ملانے والے اہم سڑک کے نظام پر واقع ہے، جس کی وجہ سے علاقے میں جاری لڑائی کو تزویراتی اہمیت حاصل ہے۔

حکومتی فورسز کے جوابی حملے اور حوثیوں کا جانی نقصان

یمنی حکومتی ذرائع کے مطابق جوابی کارروائیوں میں حوثی باغیوں کو جانی نقصان اٹھانا پڑا۔ مختلف فوجی ذرائع نے کم از کم 16 حوثی عناصر کی ہلاکت کی اطلاع دی، جبکہ ایک اور حکومتی رپورٹ میں پانچ حوثیوں کی ہلاکت اور دو کو گرفتار کرنے کا دعویٰ کیا گیا۔ انادولو نے بھی حکومتی ذرائع کے حوالے سے 18 سے زائد حوثیوں کی ہلاکت، زخمی ہونے اور بعض کے گرفتار کیے جانے کی اطلاعات رپورٹ کی ہیں۔ مختلف ذرائع کے اعداد و شمار میں فرق ہے، اس لیے حتمی ہلاکتوں کی تعداد آزادانہ طور پر تصدیق شدہ نہیں ہے۔

حکومتی فورسز کے اہلکار بھی ہلاک

دوسری جانب اے ایف پی نے ایک یمنی فوجی ذریعے کے حوالے سے بتایا کہ لڑائی میں 13 حکومتی اہلکار ہلاک ہوئے، جن میں دو افسر بھی شامل ہیں۔ ذریعے کے مطابق زیادہ تر ہلاکتیں مخا اور تعز شہر کے درمیان واقع محاذوں پر ہوئیں جبکہ کچھ اہلکار بحیرہ احمر کے ساحلی علاقوں میں جاری لڑائی میں مارے گئے۔

تین حوثی ڈرون مار گرائے گئے

یمنی فوج کے مطابق جبل حبشی کے آسمان پر پرواز کرنے والے تین حوثی ڈرونز کو بھی مار گرایا گیا۔ اس کے علاوہ مغربی ساحلی محاذوں پر کئی مزید ڈرونز کو فضائی دفاع کے ذریعے تباہ کرنے کا دعویٰ کیا گیا ہے۔ حکومتی فوج کا کہنا ہے کہ بیلسٹک میزائلوں سے اس کی ساحلی پوزیشنوں پر جاری فوجی کارروائی متاثر نہیں ہوئی۔

شہری آبادی کی نقل مکانی

مسلسل توپ خانے کی گولہ باری اور زمینی جھڑپوں کے باعث مقبنہ، کدحہ اور قریبی دیہات سے شہریوں کی نقل مکانی کی اطلاعات بھی سامنے آئی ہیں۔ مقامی ذرائع کے مطابق بعض علاقوں میں قائم بے گھر افراد کے کیمپوں سے بھی خاندان محفوظ مقامات کی جانب منتقل ہوئے ہیں۔ مقامی آبادی کے لیے صورتحال میں خوف اور غیر یقینی میں اضافہ ہوا ہے۔

اسکول پر میزائل حملہ

الوازعیہ کے علاقے میں کریم اسکول کو بھی بیلسٹک میزائل سے نشانہ بنائے جانے کی اطلاع ہے۔ مقامی اور حکومتی ذرائع کے مطابق حملہ تعلیمی سرگرمیوں کے دوران کیا گیا، تاہم اس واقعے میں کسی جانی نقصان کی اطلاع نہیں ملی جبکہ اسکول کی عمارت کو نقصان پہنچا۔

تعز۔مخا شاہراہ کی اہمیت

جاری لڑائی میں تعز شہر اور ساحلی شہر مخا کو ملانے والی شاہراہ ایک اہم تزویراتی ہدف بن چکی ہے۔ بعض مقامی ذرائع کے مطابق حوثی باغیوں کی کارروائیوں کا ایک مقصد اس اہم زمینی راستے تک رسائی حاصل کرکے تعز اور مغربی ساحل کے درمیان رابطے کو متاثر کرنا ہے۔ تاہم دستیاب عالمی ذرائع سے اس مرحلے پر یہ ثابت نہیں ہوتا کہ یہ راستہ مکمل طور پر حوثیوں کے قبضے میں آچکا ہے۔