نیکٹا کا دہشت گرد تنظیموں کیخلاف مشترکہ انٹیلی جنس بنیاد پر آپریشنز کا فیصلہ

اسلام آباد (ڈیلی اردو) دہشت گرد تنظیموں کے خلاف اداروں نے مشترکہ انٹیلی جنس کی بنیاد پر آپریشنز کا فیصلہ کرلیا۔

فیصلہ نیکٹا کی ماہانہ کاؤنٹر ٹیررازم انٹیلی جنس کانفرنس میں کیا گیا، حالیہ کالعدم قرار دی جانے والی تنظیموں کے خلاف انٹیلی جنس بیسڈ آپریشن کا فیصلہ کیا گیا، کانفرنس میں پولیس، قانون نافذ کرنے والے اداروں اور انٹیلی جنس ایجنسیوں کے نمائندوں نے شرکت کی۔

کانفرنس میں ملک کی داخلی سکیورٹی کی صورتحال اور ممکنہ خطرات کا جائزہ لیا گیا، حساس اداروں اور تمام سٹیک ہولڈرز کے درمیان انٹیلی جنس کا تبادلہ کیا گیا۔

ترجمان نیکٹا کے مطابق تمام قانون نافذ کرنے والے اداروں نے مشترکہ کوششوں سے دہشت گردی کو جڑ سے اکھاڑ پھینکنے کا عزم کیا، پاکستان کو مکمل طور پر محفوظ اور پرامن ملک بنایا جائے گا۔