وفاقی وزیرِ اطلاعات کا سنگین الزام: سہیل آفریدی کو وزیرِ اعلیٰ بنانے کا مقصد دہشتگردوں کو فری ہینڈ دینا!

اسلام آباد (ڈیلی اردو ) پاکستان کے وفاقی وزیرِ اطلاعات عطااللہ تارڑ نے الزام عائد کیا ہے کہ پاکستان تحریکِ انصاف کا سہیل آفریدی کو وزیرِ اعلیٰ نامزد کرنے کا مقصد دہشتگردوں کو خیبر پختونخوا میں فری ہینڈ دینا ہے۔

گذشتہ روز خیبر پختونخوا کے وزیرِاعلیٰ نے گورنر خیبر پختونخوا کے نام اپنے استعفے میں لکھا کہ وہ اپنے قائد اور بانی چیئرمین پاکستان تحریکِ انصاف عمران خان کے حکم کے احترام میں وزارتِ اعلیٰ کے عہدے سے مستعفی ہو رہے ہیں۔

جمعرات کے روز پریس کانفرنس سے خطاب کرتے ہوئے وفاقی وزیر نے پی ٹی آئی کا انتشاری ٹولہ دہشتگردوں کا سہولت کار ہے اور آج خیبر پختونخوا کی سیاست بھی اسی چیز کے ارد گرد گھوم رہی ہے۔

انھوں دعویٰ کیا کہ گذشتہ روز مستعفی ہونے والے خیبر پختونخوا کے وزیرِ اعلیٰ سے علی امین گنڈا پور سے رنجش یہ تھی کہ وہ ٹھیک طرح سے دہشتگردوں کی سہولت کاری نہیں کر پا رہے اور اُس حد تک یہ مشن پورا نہیں کر سکے جس کی پی ٹی آئی کے بانی کو امید تھی۔

عطا اللہ تارڑ نے دعویٰ کیا کہ خیبر پختونخوا کے نامزد وزیرِ اعلیٰ سہیل آفریدی مجرمانہ ذہنیت کے حامل ہیں اور ان پر متعدد مقدمات بھی درج ہیں۔ تاہم انھوں نے سہیل آفریدی پر درج مقدمات کے بارے میں تفصیل فراہم نہیں کیں۔

وفاقی وزیر کا مزید کہنا تھا کہ ’خیبر پختونخوا کی حکومت اور تحریکِ انصاف کو واضح کر دوں کہ پاکستان کی سکیورٹی پالیسی اسلام آباد میں بنتی ہے اور اور بنتی رہے گی، پاکستان کی سکیورٹی پالیسی کابل میں نہیں بنے گی۔‘