وی پی این استعمال کرنا ’غیر شرعی‘ عمل ہے، اسلامی نظریاتی کونسل

اسلام آباد (ڈیلی اردو) اسلامی نظریاتی کونسل نے وی پی این کے استعمال کو ’غیر شرعی‘ قرار دے دیا ہے اور کہا ہے کہ حکومت کو یہ حق حاصل ہے کہ وہ ’برائی اور برائی تک پہنچانے والے تمام اقدامات کا انسداد کرے۔‘

جمعے کو اسلامی نظریاتی کونسل سے جاری ایک بیان میں علامہ ڈاکٹر راغب نعیمی کا کہنا تھا کہ ’غیر اخلاقی اور توہین آمیز مواد تک رسائی کو روکنے یا محدود کرنے کے لیے اقدامات کرنا، جن میں وی پی این کی بندش شامل ہے، شریعت سے ہم آہنگ ہے۔‘

’غیرقانونی مواد یا بلاک شدہ ویب سائٹس تک رسائی حاصل کرنے کے لیے وی پی این کا استعمال شرعی لحاظ سے ناجائز ہے۔‘

اسلامی نظریاتی کونسل کی جانب سے بیان ایک ایسے وقت میں سامنے آیا ہے جب پاکستان کی وزارتِ داخلہ نے پی ٹی اے کو خط لکھا ہے کہ غیرقانونی وی پی این بند کیے جائیں۔

پی ٹی اے کو لکھے گئے ایک خط میں وزارتِ داخلہ کا کہنا تھا کہ دہشتگرد اپنی شناخت چھپانے اور مواد پھیلانے کے لیے بھی وی پی این کا استعمال کر رہے ہیں۔

وزارتِ داخلہ نے دعویٰ کیا کہ فحش ویب سائٹس تک رسائی اور توہین آمیز مواد شیئر کرنے کے لیے بھِی وی پی این کا استعمال کیا جا رہا ہے۔

دہشت گرد وی پی این کا استعمال کر رہے ہیں، وزارت داخلہ

پاکستان کے وزارتِ داخلہ نے پاکستان ٹیلی کمیونی کیشن اتھارٹی کو غیر قانونی وی پی این بند کرنے کے لیے خط لکھ دیا۔وزارتِ داخلہ کے مطابق دہشت گرد وی پی این کا استعمال کر رہے ہیں. وی پی این سے دہشت گرد بینک ٹرانزیکشن اور دہشت گردی میں مدد حاصل کرتے ہیں۔غیر قانونی وی پی این بند کرنے کے لیے وزارتِ داخلہ نے پی ٹی اے کو خط لکھ دیا۔

وزارتِ داخلہ کے خط کے مطابق دہشت گرد وی پی این استعمال کر رہے ہیں۔وزارتِ داخلہ کا موقف ہے کہ وی پی این سے بینک ٹرانزیکشن میں دہشت گرد مدد حاصل کرتے ہیں۔ وہ اپنی شناخت اور بات چیت بھی چھپانے میں کامیاب رہتے ہیں۔

وی پی این کو فحاشی اور توہین آمیزمواد کے پھیلاؤ کے لیے بھی بروئے کار لایا جارہا ہے اس لیے غیر قانونی وی پی این بند کردیے جانے چاہئیں۔کچھ دن قبل پاکستان ٹیلی کمیونیکیشن اتھارٹی (پی ٹی آے) نے غیر رجسٹرڈ اور غیر قانونی وی پی این کی رجسٹریشن کا محفوظ عمل متعارف کرایا تھا۔

خیال رہے کہ پاکستان ٹیلی کمیونیکشن اتھارٹی نے غیر رجسٹرڈ ورچوئل پرائیویٹ نیٹ ورکس (VPNs) کو بلاک کرنا شروع کردیا ہے۔ غیر رجسٹرڈ وی پی این کو عارضی طور پر بلاک کیا جا رہا ہے تاکہ رجسٹریشن کرالی جائے۔

پی ٹی اے نے انٹرنیٹ پر دستیاب مفت ورچوئل پرائیوٹ نیٹ ورکس (وی پی این) سروسز ختم کرتے ہوئے صارفین کے لیے رجسٹریشن کی شرط متعارف کرائی ہے۔

پی ٹی اے نے وی پی این کے رجسٹریشن فریم ورک پر اسٹیک ہولڈرز سے مشاورت بھی کی جس میں آئی ٹی کی وزارت، پی ایس ای بی اور پاکستان آئی ٹی ایسوسی ایشن کے نمائندے شریک ہوئے۔ صارفین اپنے وی پی اینز پر ایک نئے آن لائن پلیٹ فارم کے ذریعے رجسٹر ہوسکتے ہیں۔

پی ٹی اے حکام نے بتایا تھا کہ رجسٹریشن لنک کے ذریعے ممکن ہو پائے گی. یہ فریم ورک آئی ٹی کمپنیوں، فری لانسرز اور دیگر اسٹیک ہولڈرز کے لیے ہے اور اس کا مقصد قانونی اور رجسٹرڈ وی پی اینز کی بلا تعطل رسائی کو ممکن بنانا ہے۔

پی ٹی اے حکام نے بتایا کہ اجلاس میں محفوظ رابطوں کے لئے وی پی این کی اہمیت کو تسلیم کیا گیا۔ ساتھ ہی غیر قانونی سرگرمیوں میں ممکنہ غلط استعمال کے خدشات کا بھی جائزہ لیا گیا۔ رجسٹریشن کیلئے کمپنیوں اور فری لانسرز کی حوصلہ افزائی کی جائے گی۔