ٹانک میں سی ٹی ڈی اور پولیس کی کارروائی، ٹی ٹی پی کے تین دہشتگرد ہلاک

ٹانک(ڈیلی اردو) خیبرپختونخوا کے شورش زدہ ضلع ٹانک میں محکمہ انسداد دہشتگردی (سی ٹی ڈی) اور پولیس نے انٹیلی جنس معلومات کی بنیاد پر کارروائی کرتے ہوئے کالعدم تحریک طالبان پاکستان (ٹی ٹی پی) کے بھٹنی گروپ سے تعلق رکھنے والے تین دہشتگردوں کو ہلاک کردیا۔ کارروائی کے دوران اسلحہ اور گولہ بارود بھی برآمد کیا گیا۔

سکیورٹی ذرائع کے مطابق جندولہ روڈ پر گڑہ فقیرا کے علاقے میں دہشتگردوں کی موجودگی اور بڑی دہشتگرد کارروائی کی منصوبہ بندی کی اطلاع پر سی ٹی ڈی اور ضلعی پولیس کی ٹیمیں موقع پر پہنچیں تو دہشتگردوں نے فائرنگ کردی، جس کے بعد دوطرفہ فائرنگ کا تبادلہ ہوا۔ فائرنگ رکنے کے بعد علاقے میں سرچ آپریشن کیا گیا، جس کے دوران تین دہشتگردوں کی لاشیں ملیں۔

ہلاک دہشتگردوں میں اسامہ ولد سلطان اور سلیمان ولد ولی محمد شامل ہیں، جن کا تعلق جندولہ کے علاقے فقیر کلی سے بتایا گیا ہے، جبکہ تیسرے دہشتگرد کی شناخت کا عمل جاری ہے۔

ابتدائی معلومات کے مطابق ہلاک دہشتگرد پولیس اہلکاروں اور دیگر مقامات کو نشانہ بنانے کے لیے دیسی ساختہ بم (آئی ای ڈی) حملوں سمیت متعدد دہشتگرد کارروائیوں میں ملوث رہے تھے۔ انہوں نے میر عالم پمپ کے قریب ایک دکان کی چھت پر آئی ای ڈی نصب کیا تھا، جس کے دھماکے میں دو پولیس اہلکاروں اور ایک شہری سمیت تین افراد ہلاک جبکہ سات افراد زخمی ہوئے تھے۔ اس کے علاوہ وانا بازار کی مرکزی سڑک اور مقامی امن کمیٹی کے سربراہ بلال کے دفتر کی چھت پر بھی آئی ای ڈی نصب کرنے کے واقعات میں ان کے ملوث ہونے کی اطلاعات ہیں۔

ذرائع کے مطابق ہلاک دہشتگرد اسامہ کا بھائی شعیب 2025 میں بنوں چھاؤنی پر حملے کے دوران مارا گیا تھا، جبکہ وانا بازار میں پولیس پر حملے کے بعد جوابی فائرنگ میں ہلاک ہونے والا دہشتگرد موسیٰ اسامہ کا کزن تھا۔

کارروائی کے دوران دہشتگردوں کے قبضے سے تین کلاشنکوفیں، 11 میگزین، گولیاں اور ایک موبائل فون برآمد کیا گیا۔ انسپکٹر جنرل پولیس خیبرپختونخوا ذوالفقار حمید اور ایڈیشنل آئی جی سی ٹی ڈی نے کارروائی میں حصہ لینے والے اہلکاروں کی پیشہ ورانہ صلاحیتوں اور بہادری کو سراہتے ہوئے کہا کہ صوبے سے دہشتگردی کے خاتمے اور شہریوں کی جان و مال کے تحفظ کے لیے کارروائیاں جاری رہیں گی۔