ٹانک میں پاکستانی ڈرون حملہ، تبلیغی جماعت کے 2 افراد ہلاک، 2 زخمی

واشنگٹن (ش ح ط) پاکستان کے صوبے خیبرپختونخوا کے ضلع ٹانک کے گاؤں وڑوکی میں ایک مبینہ ڈرون حملے میں تبلیغی جماعت سے وابستہ دو افراد ہلاک اور دو شدید زخمی ہوگئے۔ حکام کے مطابق، یہ کارروائی خفیہ معلومات کی بنیاد پر کی گئی تھی، جن میں شدت پسند عناصر کی موجودگی کی اطلاع دی گئی تھی۔

پاکستانی ڈرون حملہ ایک مقامی مسجد کے قریب کیا گیا، جہاں تبلیغی جماعت کے ارکان سہ روزہ تبلیغی دورے پر مقیم تھے۔ ہلاک ہونے والوں کی شناخت نیک زمان ساکن مغزی اور محمد نور بیٹنی کے ناموں سے ہوئی ہے، جبکہ زخمیوں میں ممتاز علی شاہ اور حکمت اللہ شامل ہیں۔

ذرائع کے مطابق، ہلاک اور زخمی افراد کا تعلق ٹانک کے علاقوں مغزی، شادی خیل اور بیٹنی سے تھا، اور وہ تبلیغی سرگرمیوں کے سلسلے میں گاؤں وڑوکی آئے ہوئے تھے۔

مقامی افراد نے واقعے کی مذمت کرتے ہوئے کہا ہے کہ متاثرہ افراد کا کسی شدت پسند گروہ سے کوئی تعلق نہیں تھا۔ حملے کے بعد علاقے میں سیکیورٹی مزید سخت کر دی گئی ہے، جبکہ واقعے کی تحقیقات جاری ہیں۔