پاراچنار: سانحہ آرمی پبلک سکول کے شہدا کے ایصال ثواب کیلئے دعائیہ تقریب کا انعقاد

پاراچنار (محمد صادق) اے پی ایس پشاور کے سانحے کی یاد میں پاراچنار میں بھی شہدا کی یاد میں قبروں پر دعائیہ تقریب منعقد ہوئی جس میں شہدا کے لواحقین نے بھی شرکت کی۔

پاراچنار کے گلزار شہدا قبرستان میں آرمی پبلک اسکول پشاور سانحے میں شہید پاراچنار کے طلبا شہید ندیم حسین، شہید عمران علی اور شہید ابرار حسین کے قبروں پر دعائیہ تقریب منعقد ہوئی اور شہداء کے درجات کی بلندی کیلئے فاتحہ خوانی اور شہدا کی قبروں پر شمعیں روشن کئیں۔

اس موقع پر خطاب کرتے ہوئے شہید ابرار حسین کے بھائی منتظر حسین، پیپلز پارٹی کے رہنما حاجی جمیل حسین، یوسف لالا، حاجی عابد حسین، سر زاہد حسین اور علامہ مزمل حسین نے کہا کہ دہشت گردی کا یہ بدترین واقعہ ہم کبھی بھی نہیں بھولیں گے اور دہشت گردی کے خلاف ہم فورسز کے ساتھ ہیں شہدا کے لواحقین نے کہا کہ انہیں اپنے ننھے پھولوں کی قربانی پر فخر ہے۔

لواحقین اور رہنماوں نے حکومت سے مطالبہ کیا کہ پی ایس کے شہدا کے ورثا کے ساتھ کئے گئے وعدے پورے کریں سانحہ اے پی ایس پشاور کی شہدا کی یاد میں ضلع کرم کے مختلف سکولوں میں بھی تقریبات کا انعقاد کیا گیا جس میں سکولوں کے ننھے طالب علموں نے شہدائے اے پی ایس کو خراج تحسین پیش کیا اور اس عہد کا اظہار کیا کہ وہ تعلیم حاصل کرکے ہی دشمن سے انتقام لیں گے۔

سانحہ اے پی ایس کی یاد میں پاک فوج کے افسران شہدا کے گھر گئے اور ان کے لواحقین سے تعزیت کی اور شہدا کے لواحقین سے ان کے مسائل دریافت کئیں۔