پاکستانی جنرل ساحر شمشاد مرزا کا سعودی عرب کا دورہ، دو طرفہ دفاعی تعاون پر بات چیت

راولپنڈی (ڈیلی اردو) پاکستانی فوج کے شعبہ تعلقات عامہ (آئی ایس پی آر) کے مطابق چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے سرکاری دورے پر سعودی عرب میں سعودی مسلح افواج کے سربراہ جنرل فیاض بن حامد الروویلی سے ملاقات کی۔

ملاقات میں خطے کی ابھرتی ہوئی صورتحال اور پاکستان و سعودی عرب کے درمیان دو طرفہ دفاعی تعاون کو مزید فروغ دینے پر تبادلہ خیال کیا گیا۔ دونوں عسکری قیادت نے دفاعی شراکت داری کو مزید مضبوط بنانے کے عزم کا اعادہ کیا۔

آئی ایس پی آر کے مطابق پاکستان اور سعودی عرب کے درمیان عسکری تعلقات کے فروغ میں نمایاں خدمات کے اعتراف میں جنرل ساحر شمشاد مرزا کو کنگ عبدالعزیز میڈل آف آنر (ایکسِلینٹ کلاس) سے نوازا گیا۔

سعودی عسکری قیادت نے دہشت گردی کے خلاف جنگ میں پاکستان کی مسلح افواج کی پیشہ ورانہ مہارت اور قربانیوں کو سراہا۔