پاکستان سے گرفتار داعش سرغنہ شریف اللہ کو امریکی عدالت میں پیش کردیا

ورجینیا (ڈیلی اردو) پاکستان کی جانب سے گرفتار داعش کے اہم سرغنہ شریف اللہ کو امریکی ریاست ورجینیا کی عدالت میں پیش کردیا گیا۔

امریکی حکام کے مطابق شدت پسند کو ابتدائی سماعت کیلئے ورجینیا کی عدالت میں پیش گیا گیا، کیس کی تفصیلی سماعت پیر کو ہوگی، شریف اللہ نے جج سے بات کرنے کیلئے مترجم کی خدمات لیں، شریف اللہ ان 2 ملزمان میں سے ایک ہے جو کابل حملے میں ملوث ہیں۔

https://x.com/FBIDirectorKash/status/1897380619023216841?t=syo-B1lZzAkxx0JvjtWr1g&s=19

ڈائریکٹر ایف بی آئی کیش پٹیل نے ایکس پر بیان میں کہا کہ گرفتار دہشت گرد شریف اللہ امریکی فوجیوں کے ہلاکت میں ملوث ہے، امریکی انصاف کا سامنا کرنے کیلئے ملزم پہنچ چکا ہے، ہمارے شراکت داروں اور ایجنسی کے بہادر اہلکاروں کا شکریہ۔

یاد رہے کہ امریکی صدر ڈونلڈ ٹرمپ نے افغانستان میں امریکی فوج پر حملے کے ذمے دار دہشت گرد کی گرفتاری پر حکومت پاکستان کا شکریہ ادا کیا ہے۔

ٹرمپ نے کانگریس کے مشترکہ اجلاس سے پہلے خطاب میں کہا کہ ساڑھے تین سال پہلے حملے میں 13 امریکی اہلکاروں سمیت متعدد افراد ہلاک ہوئے، دہشت گردی کے اس واقعے کا ذمے دار پکڑا گیا ہے، اسے انصاف کے کٹہرے میں لانے کے لیے امریکا منتقل کیا جارہا ہے۔

واضح رہے کہ 26 اگست2021 میں امریکی فوج کے انخلا کے دوران کابل ایئر پورٹ پر خودکش حملہ ہوا تھا جس میں 13 امریکی فوجیوں سمیت 170 شہری ہلاک ہوگئے تھے۔