پاکستان: فیلڈ مارشل عاصم منیر سے امریکی ارکان کانگریس کی اہم ملاقات

راولپنڈی (نمائندہ ڈیلی اردو) پاکستان کے چیف آف آرمی اسٹاف فیلڈ مارشل سید عاصم منیر سے امریکی کانگریس کے ایک وفد نے جنرل ہیڈکوارٹرز (جی ایچ کیو) راولپنڈی میں ملاقات کی، جس میں علاقائی سلامتی، دوطرفہ دفاعی تعاون، اقتصادی روابط اور باہمی دلچسپی کے دیگر امور پر تفصیلی تبادلہ خیال کیا گیا۔

پاکستانی فوج کے شعبہ تعلقات عامہ (آئی ایس پی آر) کے مطابق امریکی وفد میں ریاست مونٹانا سے کانگریس کے رکن رائن کیتھ زنکے اور ریاست واشنگٹن سے مائیکل جیمز شامل تھے۔

آئی ایس پی آر کے مطابق ملاقات کے دوران خطے کی مجموعی سکیورٹی صورتحال، پاکستان اور امریکہ کے درمیان دفاعی تعاون، اقتصادی شراکت داری اور خوشحالی کے فروغ سے متعلق مختلف امور زیر غور آئے۔ دونوں فریقوں نے دوطرفہ اقتصادی روابط کو مزید وسعت دینے، نجی شعبے کے درمیان تعاون بڑھانے اور تجارتی تعلقات کو مضبوط بنانے کے امکانات پر بھی گفتگو کی۔

اس موقع پر فیلڈ مارشل سید عاصم منیر نے پاکستان کی اقتصادی صلاحیتوں پر روشنی ڈالتے ہوئے کہا کہ پائیدار علاقائی استحکام کا انحصار مضبوط معیشت، تجارت کے فروغ اور علاقائی روابط کے استحکام پر ہے۔ 

انہوں نے کہا کہ حکومت کاروبار دوست ماحول کی تشکیل، سرمایہ کاروں کے اعتماد میں اضافے اور غیرملکی سرمایہ کاری کے فروغ کے لیے مختلف اصلاحات پر عمل پیرا ہے۔

آئی ایس پی آر کے مطابق امریکی ارکان کانگریس نے خطے میں امن و استحکام اور اقتصادی ترقی کے لیے پاکستان کے کردار کو سراہا اور دونوں ممالک کے درمیان تعاون کو مزید وسعت دینے میں دلچسپی کا اظہار کیا۔

وفد نے ملاقات کے دوران پاکستانی عسکری قیادت کی مہمان نوازی پر شکریہ ادا کیا اور اس عزم کا اعادہ کیا کہ امریکہ اور پاکستان کے درمیان اقتصادی، تجارتی اور ادارہ جاتی روابط کو مزید مستحکم بنانے کے لیے مشترکہ کوششیں جاری رکھی جائیں گی۔

آئی ایس پی آر کے مطابق ملاقات خوشگوار ماحول میں ہوئی، جس میں دونوں ممالک کے درمیان دیرینہ تعلقات کو مزید مضبوط بنانے اور باہمی تعاون کے نئے مواقع سے فائدہ اٹھانے کے عزم کا اظہار کیا گیا۔