پاکستان میں ایک لاکھ سے زائد شہریوں پر سفری پابندیاں عائد!

اسلام آباد (ڈیلی اردو) وزارت داخلہ کے ذرائع کے مطابق پاکستان میں بیرونی ممالک میں جرائم، سیاسی وجوہات اور عسکری یا فرقہ وارانہ تنظیموں سے تعلق کی بنیاد پر ایک لاکھ سے زائد پاکستانی شہریوں پر ملک چھوڑنے کی پابندی عائد کی جا چکی ہے۔

ذرائع نے بتایا کہ مختلف بنیادوں پر ملک چھوڑنے پر پابندی کے شکار افراد کی تفصیل کچھ یوں ہے

تقریباً 70 ہزار پاکستانی شہری بیرونی ممالک میں جرائم کے الزام میں بلیک لسٹ کیے گئے ہیں۔

10 ہزار سے زائد شہریوں کو جعلی دستاویزات کے استعمال پر پابندی عائد کی گئی ہے۔

2 ہزار سے زائد افراد سیاسی بنیادوں پر اسٹاف لسٹ میں شامل ہیں۔

مسلح اور فرقہ وارانہ تنظیموں سے تعلق رکھنے والے 20 ہزار سے زائد افراد پر پابندی ہے، جبکہ ایک ہزار سے زائد غیر ملکی شہری بھی اس فہرست میں شامل ہیں۔

تقریباً 10 ہزار افراد کو قتل، فراڈ اور دیگر ایف آئی آرز کے تحت بلیک لسٹ کیا گیا ہے۔

100 سے زائد صحافی، یوٹیوبرز اور سوشل میڈیا ایکٹوسٹ پر بھی ملک چھوڑنے کی پابندی عائد ہے۔

ذرائع وزارت داخلہ نے واضح کیا ہے کہ یہ اقدامات ملکی اور بین الاقوامی سطح پر قانون کے دائرے میں برقرار سکیورٹی، جرائم کے خاتمے اور غیر قانونی سرگرمیوں کو روکنے کے لیے اٹھائے جا رہے ہیں۔

وزارت داخلہ کے مطابق ان پابندیوں کا مقصد غیر قانونی سرگرمیوں میں ملوث افراد کو بین الاقوامی سطح پر پاکستان کی ساکھ متاثر کرنے سے روکنا اور ملکی سکیورٹی کو یقینی بنانا ہے۔