پاکستان کے ساتھ جنگ کسی بھی وقت ممکن ہے، بھارتی وزیر دفاع

نئی دہلی (ڈیلی اردو) بھارت کے وزیرِ دفاع راج ناتھ سنگھ نے خبردار کیا ہے کہ انڈیا اور پاکستان کے درمیان کبھی بھی جنگ ہو سکتی ہے۔

پیر کے روز نئی دلیّ میں دفاعی سازوسامان بنانے والی کمپنیوں کی ایک انجمن کے زیرِ اہتمام تقریب سے خطاب کے دوران راج ناتھ سنگھ نے رواں سال 22 اپریل کو سیاحتی مقام پہلگام میں سیاحوں کی ہلاکت کا ذکر کرتے ہوئے کہا، ’یہ واقعہ اس بات کی تلخ یاد دہانی ہے کہ اب کبھی بھی بغیر کسی پیشگی وارننگ کے کشیدگی میں اضافہ ہو سکتا ہے۔ اس لیے انڈیا کو اس بات کے لیے تیار رہنا ہو گا کہ کبھی بھی اچانک جنگ چھِڑ سکتی ہے۔‘

راج ناتھ سنگھ اس سے قبل بھی کئی مرتبہ کہہ چکے ہیں کہ ’آپریشن سندور‘ ختم نہیں ہوا ہے بلکہ اس کو محض معطل کیا گیا ہے۔

تاہم یہ پہلی بار ہے کہ انھوں نے انڈیا اور پاکستان کے درمیان اچانک جنگ چھِڑنے کا امکان ظاہر کیا ہے۔

اس بیان پر اکثر حلقوں کا کہنا ہے کہ انڈیا کی ریاست بہار میں اگلے ہفتے ہونے والے ریاستی اسمبلی کے انتخابات میں برتری حاصل کرنے کے لیے حکمران جماعت بھارتیہ جنتا پارٹی کے رہنما پاکستان مخالف لہجہ اپنا رہے ہیں۔

اس کے باوجود انڈیا کے زیرِ انتظام کشمیر کے سرحدی علاقوں میں اس بیان کے بعد تشویش کی لہر دوڑ گئی ہے۔

لائن آف کنٹرول کے قریب واقع پونچھ ضلع کی سرحدی بستیوں میں لوگوں نے بنکرز کی صفائی شروع کر دی ہے۔

رواں سال مئی میں پاکستان اور انڈیا کے درمیان ہونے والی جنگ کے دوران پونچھ میں ایک سرکاری افسر سمیت 21 افراد مارے گئے تھے جبکہ کشمیر کی گُریز ویلی سے سینکڑوں افراد کو نقل مکانی کرنی پڑی تھی۔

پونچھ کے چکاندا باغ کے رہائشی محمد حُسین کھٹانہ کہتے ہیں: ’اس سال مئی میں جو ہوا، وہ ہماری نسل کے لیے پہلا تجربہ تھا۔ حالانکہ ہم اپنے والدین اور دیگر بزرگوں سے سُنتے آئے ہیں کہ ماضی میں بھی جنگیں ہوئی ہیں۔ مئی میں سیز فائر کے بعد ہم نے راحت کا سانس لیا تھا، لیکن اب دوبارہ جنگ کی باتیں ہو رہی ہیں اور یہاں سے کئی خاندان ایک بار پھر نقل مکانی کے بارے میں سوچ رہے ہیں۔‘

یہاں یہ بات قابل ذکر ہے کہ انڈین حکومت نے کئی برس قبل سرحدی بستیوں میں گیارہ ہزار بنکرز بنانے کے منصوبے کا اعلان کیا تھا۔ اس سال مئی کی جنگ کے بعد اس منصوبے پر تیزی سے عمل کے لیے انتظامیہ کو متحرک کیا گیا ہے۔

ایل او سی کے قریبی واقع قصبہ کرناہ کے سیّد کوثر سلام کہتے ہیں: ’بنکر بننے کا مطلب جان کی ضمانت نہیں ہے، کیونکہ ہمارے گاوٴں میں تو کئی لوگ اپنے بنکر کے قریب گولہ گرنے سے ہلاک ہو گئے تھے۔‘

اس کے باوجود ان خیال میں بنکرز گھروں سے زیادہ محفوظ ہوتے ہیں۔

’فوج نے کئی بنکرز بنوائے ہیں، لیکن پوری آبادی کے لیے بنکرز تعمیر کرنا ایک کام طویل ہو سکتا ہے اور اگر اتنے میں جنگ ہو گئی تو کیا ہو گا؟‘